డ్రోన్ సహకారంతోనే ఖైరతాబాద్ వినాయకుడి నిమజ్జనం చేయనున్నట్లు మేయర్ బొంతు రామ్మోహన్ తెలిపారు. ఏటా ఖైరతాబాద్ గణేష్ నిమజ్జనం సందర్భంగా విగ్రహం పాక్షికంగానే నిమజ్జనం అవడం వల్ల ఏర్పడే ఇబ్బందులను తొలగించాలని నిర్వాహకులు చేసిన విజ్ఞప్తికి మేయర్ స్పందించారు.
మలేషియా డ్రోన్ టెక్నాలజీ ద్వారా నిమజ్జన ప్రక్రియ సాఫీగా జరిపే విధానాన్ని రామ్మోహన్ పరిశీలించారు. ఈ సాంకేతికతను ఉపయోగించి విగ్రహాన్ని ఎక్కడ నిమజ్జనం చేస్తే పూర్తిగా నిమజ్జనం అవుతుందనే విషయాన్ని డ్రోన్ తెలుపుతుందన్నారు. డ్రోన్ కెమెరా తన సిగ్నల్స్ని హుస్సేన్ సాగర్లోకి పంపడం ద్వారా కచ్చితమైన లోతు తెలుస్తుందని మేయర్ వివరించారు. దీని వల్ల విగ్రహం పూర్తిగా నిమజ్జనం అవుతుందన్నారు. లోతు తక్కువగా ఉన్న చోట బండ ఉందా... మట్టి ఉందా... అనేది పరిశీలించి మట్టి ఉన్న చోటును గుర్తించనున్నారు. అవసరమైతే విగ్రహం లోతుకు అనుగుణంగా తాత్కాలిక తవ్వకాల ద్వారా నిమజ్జనం సాఫీగా నిర్వహించొచ్చని మేయర్ స్పష్టం చేశారు.
ఇవీ చూడండి : దేశంలో పాలన గాడితప్పింది: మల్లు రవి
