'కేసీఆర్.. మద్యపాన నిషేధం అమలు చేస్తారా?'

జోగులాంబ గద్వాల జిల్లా సాధన కోసం తాను రెండు రోజులు నిరాహార దీక్ష చేపడితే ప్రత్యేక జిల్లా సాధ్యం కాదన్నారు. కానీ దాన్ని సాధ్యం చేసి చూపించానని వ్యాఖ్యానించారు మాజీ మంత్రి, భాజపా నాయకురాలు డీకే అరుణ. మద్యం అమ్మకాలు నియంత్రించాలంటూ.. రేపు ఇందిరాపార్కు వద్ద మహిళా సంకల్ప దీక్ష చేపట్టనున్నట్లు తెలిపారు.

విచ్చలవిడి మద్యం అమ్మకాల వల్లే రాష్ట్రంలో అత్యాచార ఘటనలు జరుగుతున్నాయని భాజపా నాయకురాలు, మాజీ మంత్రి డీకే అరుణ అన్నారు. రేపు ఇందిరాపార్కు వద్ద మహిళా సంకల్ప దీక్ష చేపడుతున్నట్లు ఆమె వివరించారు. మద్యం అమ్మకాలను నియంత్రించడానికే దీక్షని పేర్కొన్నారు. రేపటి దీక్షపై మీడియా ప్రతినిధులతో ఇష్టాగోష్ఠిగా అరుణ మాట్లాడారు.

సీఎం అమలు చేస్తారా?

ఒక్క రోజులో మార్పు తీసుకురాలేమని... మద్యం నిషేధం కోసం భాజపా మహిళా సంకల్ప దీక్ష పేరిట తాను రెండు రోజులు నిరాహార దీక్షకు పూనుకున్నట్లు వివరించారు. తెలంగాణలో మద్యం వల్లనే ఎక్కువ ఆదాయం వస్తోందని... అలాంటప్పుడు సీఎం కేసీఆర్ మద్యపాన నిషేధం అమలు చేస్తారా అని అందరూ అనుమానం వ్యక్తం చేస్తున్నారని తెలిపారు.

సాధ్యం కాదన్నారు.. చేసి చూపెట్టా..

సీఎం కేసీఆర్ తనకి నచ్చిన విషయాల్లో మాత్రమే పక్క రాష్ట్రాలతో పోల్చుకుంటారని విమర్శించారు. తాను చేపట్టనున్న దీక్షలో పార్టీలోని ముఖ్యులందరూ పాల్గొంటారని అరుణ వివరించారు. మద్యపాన నిషేధాన్ని అమలు చేసేలా భాజపా అడుగులు వేస్తోందన్నారు. గద్వాల జిల్లా కోసం రెండు రోజులు దీక్ష చేస్తే సాధ్యంకాదన్నారని... సాధించి చూపెట్టానని పేర్కొన్నారు. ఆర్టీసీ సమ్మె విషయంలో కేంద్ర ప్రభుత్వ ఒత్తిడిని గ్రహించే కేసీఆర్ తగ్గారని చెప్పారు.

ఇదీ చూడండి : సంక్షేమ బోర్డు.. సరకుల రవాణా.. బస్సుల తగ్గింపు!