జీహెచ్ఎంసీ ఎన్నికల్లో పోటీ చేయాలని జనసేన నిర్ణయించింది. యువ కార్యకర్తల విజ్ఞప్తి మేరకు నిర్ణయం తీసుకున్నట్లు జనసేనాని పవన్ కల్యాణ్ వెల్లడించారు. క్రియాశీలకంగా ఉన్న కార్యకర్తలు, యువ జనసైనికులు నుంచి ఈ అంశంపై పలు విజ్ఞప్తులు వచ్చాయని తెలిపారు. వారి వినతి మేరకు జీహెచ్ఎంసీ ఎన్నికల్లో పోటీకి సన్నద్ధం కావాలని పార్టీ నాయకులు, నగర పరిధిలోని కమిటీలకు పవన్ స్పష్టం చేశారు.
నా వద్దకు వచ్చిన కార్యకర్తలు, కమిటీల ప్రతినిధులు ఇప్పటికే పలు దఫాలు సమావేశమై చర్చించుకున్నారు. జీహెచ్ఎంసీలోని పలు డివిజన్లలో ఉన్న జనసేన కమిటీలు క్షేత్ర స్థాయిలో పని చేస్తూ... ప్రజల పక్షాన నిలబడ్డాయి. తమ కార్యకలాపాలపై సమగ్రంగా సమీక్షించుకుంటున్నాయి. ఈ ఎన్నికల్లో పోటీ చేయాలని క్షేత్ర స్థాయిలోని కార్యకర్తలు బలంగా కోరుకుంటున్నారు. వారి అభీష్టానికి అనుగుణంగా జనసేన పార్టీ జీహెచ్ఎంసీ ఎన్నికల్లో అభ్యర్థులను నిలుపుతుంది.
- పవన్ కల్యాణ్
45 నుంచి 60 డివిజన్లలో పోటీ చేయబోతున్నట్లు జనసేన ప్రకటించింది. కార్యకర్తల అభీష్టం మేరకు పోటీ చేస్తున్నట్లు పార్టీ రాష్ట్ర ఇంఛార్జీ శంకర్ గౌడ్ తెలిపారు. కార్యకర్తలు, కమిటీ ప్రతినిధులతో సమావేశమై నిర్ణయం తీసుకున్నట్లు స్పష్టం చేశారు. క్రియాశీల కార్యకర్తలు, యువ జనసైనికులను బరిలోకి దింపుతున్నట్లు వెల్లడించారు. నగరంలోని ప్రధాన సమస్యలే ఎజెండాగా ప్రజల్లోకి వెళ్లనున్నట్లు పేర్కొన్నారు.
ఇదీ చదవండి : గ్రేటర్ నగారా: డిసెంబరు 1న జీహెచ్ఎంసీ ఎన్నికలు
