Central Government Water Awards To Telangana : కేంద్ర ప్రభుత్వం ప్రకటించే అవార్డుల్లో తెలంగాణ రాష్ట్ర విజయ పరంపర కొనసాగుతూనే ఉంది. ఉత్తమ నీటి విధానాలను అవలంభించడంతో పాటు ప్రజల్లో అవగాహన కల్పించినందుకు భద్రాద్రి కొత్తగూడెం జిల్లా జగన్నాథపురం గ్రామ పంచాయతీ జాతీయ స్థాయిలో ఉత్తమ పంచాయతీగా ఎంపికైంది. ఈ నాలుగో జాతీయ నీటి అవార్డులను కేంద్ర జలశక్తి శాఖ ప్రకటించింది. అలాగే ఉత్తమ జిల్లాల కేటగిరీలో ఆదిలాబాద్ జిల్లాకు మూడో స్థానం దక్కింది. ఉత్తమ సంస్థల విభాగంలో హైదరాబాద్లోని మౌలానా ఆజాద్ జాతీయ ఉర్దూ విశ్వ విద్యాలయానికి రెండో స్థానం లభించింది. ఈ నెల 17న దిల్లీ విజ్ఞాన్ భవన్లో జరగనున్న కార్యక్రమంలో.. ఉప రాష్ట్రపతి చేతుల మీదుగా అవార్డులు అందించనున్నారు.
మొత్తం 11 విభాగాల్లో 41 అవార్డులను కేంద్ర ప్రభుత్వం ప్రకటించింది. ఉత్తమ రాష్ట్రంగా మధ్యప్రదేశ్, ఉత్తమ జిల్లాగా ఒడిశాలోని గంజాం జిల్లా ఎంపికైంది. ఉత్తమ రాష్ట్రాల విభాగంలో ఆంధ్రప్రదేశ్.. బిహార్తో కలిసి సంయుక్తంగా మూడో స్థానంలో నిలిచింది. నంద్యాల జిల్లా చాగలమర్రి కేజీబీవీ పాఠశాల ఉత్తమ పాఠశాలలుగా రెండో స్థానం సంపాదించింది. ఉత్తమ పరిశ్రమల విభాగంలో తిరుపతికి చెందిన సీసీఎల్ ప్రొడక్ట్స్ మూడో స్థానంలో నిలవగా.. ఉత్తమ ఎన్జీవోగా అనంతపూర్కు చెందిన అక్కియాన్ ఫ్రాటెర్నా ప్రోత్సాహక బహుమతి దక్కించుకుంది.
3rd place for Adilabad in National Best District Award : అలాగే తెలంగాణలో అడవుల పెరుగుదల, మున్సిపల్ ఘన వ్యర్థాల నిర్వహణ, మురుగునీటి శుద్ధి వంటి తదితర పర్యావరణహిత కార్యక్రమాల్లో తెలంగాణ అగ్రస్థానంలో నిలిచింది. ఈ విషయాన్ని ప్రపంచ పర్యావరణ దినోత్సవం రోజున శాస్త్ర పర్యావరణ కేంద్రం- సీఎస్ఈనే స్వయంగా స్టేట్ ఆఫ్ స్టేట్ ఎన్విరాన్మెంట్ పేరుతో నివేదకను విడుదల చేసింది. దేశంలోని మొత్తం 29 రాష్ట్రాలలో 7,213 పాయింట్లతో తెలంగాణ అగ్రస్థానంలోనూ.. రాజస్థాన్ చివరి స్థానంలోనూ నిలిచింది.
Maulana Azad National Urdu University in Hyderabad : మరోవైపు గత నెలలో కేంద్ర ప్రభుత్వం రెండు ప్రతిష్ఠాత్మక అవార్డులను తెలంగాణకు ఇచ్చింది. అందులో గ్రామీణ స్వచ్ఛ సర్వేక్షణ్ అగ్రస్థానంలో నిలవగా.. 12,769 గ్రామాలు నూటికి నూరుశాతం బహిరంగ మల మూత్ర విసర్జన రహిత(ఓడీఎఫ్) ప్లస్గా ఎంపికయ్యాయి. తాజాగా తెలంగాణలోని 5 నిర్మాణాలకు అంతర్జాతీయ అవార్డులు వచ్చాయి. ఇంటర్నేషనల్ బ్యూటీపుల్ బిల్డింగ్స్ గ్రీన్ యాపిల్ అవార్డులను బీఆర్ అంబేడ్కర్ సచివాలయం, యాదాద్రి లక్ష్మీ నరసింహ దేవస్థానం, దుర్గం చెరువులోని కేబుల్ బ్రిడ్జ్, పోలీస్ కమాండ్ కంట్రోల్ సెంటర్, మొజాంజాహీ మార్కెట్కు ఈ అవార్డులు దక్కాయి.
ఇవీ చదవండి :
