KTR ON IT: రాష్ట్రంలో ఎనిమిదేళ్లలో 4 లక్షలకు పైగా ఐటీ ఉద్యోగాలు వచ్చాయని రాష్ట్ర ఐటీశాఖ మంత్రి కేటీఆర్ వెల్లడించారు. గతేడాదిలోనే లక్షన్నర ఉద్యోగాలు హైదరాబాద్లో వచ్చాయని మంత్రి తెలిపారు. కరోనా ఉన్నా కూడా హైదరాబాద్ నుంచి ఐటీ ఎగుమతులు పెరిగాయని పేర్కొన్నారు. హైదరాబాద్లో 2021-22 ఏడాదికి సంబంధించిన ఐటీ వార్షిక నివేదికను మంత్రి విడుదల చేశారు.
ఐటీలో 8 ఏళ్లుగా తెలంగాణ అద్భుతమైన పురోగతి సాధించిందని మంత్రి కేటీఆర్ స్పష్టం చేశారు. కరోనా ఉన్నా గతేడాది అంచనాలకు మించి రాణించామని తెలిపారు. ఐటీ, అనుబంధ ఎగుమతుల్లో గతేడాది 26.14 శాతం వృద్ధి నమోదైందని పేర్కొన్నారు. జాతీయ సగటు 17.2 శాతం కంటే 9 శాతం ఎక్కువ సాధించామని వెల్లడించారు. గతేడాది దేశవ్యాప్తంగా నాలుగున్నర లక్షల ఉద్యోగాలు వస్తే.. ఒక్క హైదరాబాద్‌లోనే లక్షన్నర వచ్చాయని తెలిపారు.
ఐటీలో 8 ఏళ్లుగా అద్భుతమైన పురోగతి సాధించాం. కరోనా ఉన్నా గతేడాది అంచనాలకు మించి రాణించాం. ఐటీ, అనుబంధ ఎగుమతుల్లో గతేడాది 26.14 శాతం వృద్ధి సాధించాం. జాతీయ సగటు కంటే 9 శాతం ఎక్కువ సాధించాం. హైదరాబాద్లో 8 ఏళ్లుగా ఐటీ పరిశ్రమ వేగంగా అభివృద్ధి చెందింది. ఏడాదిలో లక్షన్నర ఉద్యోగాలు హైదరాబాద్లో వచ్చాయి. హైదరాబాద్ నుంచి ఐటీ ఎగుమతులు పెరిగాయి. - కేటీఆర్, ఐటీశాఖ మంత్రి
వన్‌ ప్లస్‌ కంపెనీ హైదరాబాద్లో టీవీలు తయారుచేస్తోందని కేటీఆర్ హర్షం వ్యక్తం చేశారు. ప్రస్తుతం తెలంగాణలో ఐటీ ఉద్యోగుల సంఖ్య 7,78,121కు చేరిందని తెలిపారు. ఈ నెల 20న టీహబ్ రెండో దశ ప్రారంభిస్తామని మంత్రి వెల్లడించారు. టీ వర్క్స్ కొత్త ఫెసిలిటీ కేంద్రాన్ని ఆగస్టులో ప్రారంభించే యోచనలో ఉన్నట్లు కేటీఆర్ పేర్కొన్నారు. ప్రపంచ ప్రఖ్యాత కంపెనీలు హైదరాబాద్లో భారీగా పెట్టుబడులు పెడుతున్నాయని... తెలంగాణ, హైదరాబాద్ను గమ్యస్థానంగా తీర్చిదిద్దుతున్నామని కేటీఆర్ వివరించారు. ద్వితీయశ్రేణి నగరాలకు ఐటీ విస్తరించడంతో పాటు ఎమర్జింగ్ టెక్నాలజీస్కు కూడా ఉత్తమ గమ్యస్థానం లక్ష్యంతో పనిచేస్తున్నట్లు చెప్పారు. ఫేసియల్ రికగ్నైజేషన్ పరిజ్ఞానంతో డ్రైవింగ్ లైసెన్స్ రెన్యువల్ గురించి చెబితే ప్రపంచ ఆర్థికవేదిక సదస్సులో చాలామంది ఆశ్చర్యపోయారని మంత్రి తెలిపారు.
ఇవీ చూడండి: యాక్సిస్‌ బ్యాంక్‌కు షాక్‌ ఇచ్చిన కార్వీ స్టాక్‌ బ్రోకింగ్‌ సంస్థ
నలుగురు యువకులపైకి దూసుకెళ్లిన కారు.. అంతెత్తున గాల్లోకి ఎగిరిపడి..!
