రాష్ట్ర ప్రభుత్వం విధించిన లాక్డౌన్ హైదరాబాద్ నగరంలో ఎలా అమలు అవుతుందో తెలుసుకునేందుకు... రాష్ట్ర మానవ హక్కుల కమిషన్ చైర్మన్ జస్టిస్ చంద్రయ్య క్షేత్రస్థాయిలో పర్యటించారు. లాక్డౌన్ అమలును స్వయంగా గమనించే ప్రయత్నంలో భాగంగా... జస్టిస్ జి. చంద్రయ్య హైదరాబాద్, సైబరాబాద్, రాచకొండ కమిషనరేట్స్ పరిధిలోని కొన్ని ప్రాంతాల్లో పర్యటించారు. పలు ప్రాంతాల్లోని చెక్పోస్టుల వద్ద పోలీసు సిబ్బందితో మాట్లాడారు. రికార్డులను పరిశీలించి, వారి అభిప్రాయాలను అడిగి తెలుసుకున్నారు. అలాగే, ఆయా ప్రాంతాల ప్రజల స్పందనలను తెలుసుకున్నారు.
ముఖ్యంగా పాతబస్తీలో స్పెషల్ పోలీస్ ఫోర్స్ వారిని కలిశారు. అక్కడి ప్రజలు లాక్డౌన్ను మనస్పూర్తిగా, స్వచ్ఛందంగా పాటిస్తున్నారని తెలుసుకొని హర్షం వ్యక్తం చేశారు. కరోనా మహమ్మారిని కట్టడి చేయాలంటే లాక్డౌన్ ఒక్కటే ఆయుధమని సూచించారు. ప్రతి ఒక్కరూ నిబంధనలు పాటించాలని విజ్ఞప్తి చేశారు. అనంతరం పోలీసులు, ఆరోగ్య, పారిశుద్ధ్య ఇతర సిబ్బందికి హృదయపూర్వక అభినందనలు తెలియజేశారు.
ఇవీ చదవండి: నేడు, రేపు కొవిడ్‌ వ్యాక్సినేషన్‌ నిలిపివేత
