హైదరాబాద్ మహానగరానికి మణిహారంగా ఉన్న ఔటర్‌ రింగ్‌రోడ్డు చుట్టూ జలహారం ఏర్పాటుకానుంది. ఇందులో భాగంగా 3000 ఎంఎం వ్యాసార్ధంతో భారీ పైపులైన్‌ను 158 కిలోమీటర్ల అవుటర్ చుట్టూ నిర్మించాలని గతంలో జలమండలి అధికారులు నిర్ణయించారు. ఔటర్‌ చుట్టూ ఐటీ కంపెనీలు, సెజ్‌లు, భారీ వెంచర్లు వస్తుండటంతో ఈ ప్రాజెక్టు కూడా కార్యరూపం దాల్చనుంది. ఈ భారీ పైప్‌లైన్‌కు నగరానికి నీటిని అందించే అన్ని వ్యవస్థలను అనుసంధానం చేయనున్నారు. త్వరలో నిర్మించనున్న కేశవాపురం, దేవులమ్మనాగారం బ్యాలెన్సింగ్‌ రిజర్వాయర్లను సైతం ఈ లైన్‌కు లింకు చేస్తారు. కరెంటు సరఫరా వ్యవస్థను అనుసంధానం చేసే గ్రిడ్‌ మాదిరిగా.. ఇలా నగర తాగునీటి వ్యవస్థను గ్రిడ్‌లా కలపనున్నారు. ఫలితంగా ఏ వైపు నుంచైనా నగరానికి తాగునీటిని అందించేలా ప్రాజెక్టు రూపకల్పన చేయనున్నారు.
రింగ్‌మెయిన్‌లో కీలకాంశాలు...
* ఈ ప్రాజెక్టుకు గతంలో రూ.4,765 కోట్లు ఖర్చు అవుతుందని జలమండలి తేల్చింది. అయితే పెరిగిన ధరలు పరిగణనలోకి (ఎస్‌ఎస్‌ఆర్‌) తీసుకుంటే రూ.5,376 కోట్లు వరకు ఖర్చవుతుందని అధికారులు అంచనా వేస్తున్నారు.
* నగరానికి కృష్ణా, గోదావరి, మంజీరా, జంటజలాశయాల నుంచి నిత్యం 460 మిలియన్‌ గ్యాలన్ల వరకు సరఫరా చేస్తున్నారు. అయితే వీటికి సంబంధించి ప్రధాన పైపులన్నీ అవుటర్ రింగ్‌ రోడ్డు దాటి నగరంలోని రిజర్వాయర్లకు చేరుతున్నాయి.
* ప్రస్తుతం అవుటర్ రోడ్డు చుట్టూ ప్రధాన రియల్‌ సంస్థలన్నీ ప్రాజెక్టులు చేపడుతున్నాయి. రానున్న రోజుల్లో తాగునీటి డిమాండ్‌ రెండు మూడు రెట్లు పెరగనుంది.
* ఇప్పటికే 192 గ్రామాలకు రూ.750 కోట్లతో ప్రత్యేక తాగునీటి వ్యవస్థకు జలమండలి శ్రీకారం చుట్టింది. త్వరలో మరో రూ. 2 వేల కోట్లతో కొత్త ప్రాంతాలకు పైపులైన్లను విస్తరించనున్నారు. ప్రస్తుతం అందుబాటులో ఉన్న వ్యవస్థ నుంచి తాగునీటిని కేటాయించడం కష్టమే. ఈ నేపథ్యంలో అవుటర్ చుట్టూ ప్రత్యేక వ్యవస్థ అవసరం ఉంది.
* ఇందులో భాగంగా ఔటర్‌ చుట్టూ 158 కి.మీ పొడవునా 3000 ఎంఎం వ్యాసార్ధంతో భారీ పైపులైన్ వేయాలనేది ప్రతిపాదన. ఇందులో భాగంగా ఇప్పటికే రూ.285 కోట్లతో ముత్తంగి నుంచి కోకాపేట వరకు 18 కిలోమీటర్ల మేర రింగ్‌మెయిన్‌ నిర్మించారు. ఇంకా 140 కి.మీ మేర పైపులైన్ రానుంది.
* అవుటర్ చుట్టూ 18 చోట్ల రేడియల్‌ రోడ్లు ఉన్నాయి. వీటికి అనుసంధానంగానే ప్రాజెక్టులు రానున్నాయి. ఈ రేడియల్‌ అనుసరించి 98 కి.మీ మేరకు రేడియల్‌ మెయిన్స్‌ నిర్మించనున్నారు. ఇక్కడ నుంచి మిగతా ప్రాంతాలకు నీటిని సరఫరా చేస్తారు.
* అంతేకాక రింగ్‌మెయిన్‌ చుట్టూ 110 మిలియన్‌ లీటర్ల సామర్థ్యంతో 12 స్టోరేజీ రిజర్వాయర్లు నిర్మించనున్నారు. అత్యవసర పరిస్థితిలో ఏదైనా కారణంతో నగరానికి నీటి సరఫరా ఆగిపోతే ఈ స్టోరేజీ రిజర్వాయర్ల నుంచి నీటిని తరలించడానికి అవకాశం ఉంది.
ఇదీ చదవండి: MUSHEERABAD SEWERS: మురికికూపంగా మారిన ముషీరాబాద్ కాలనీలు
