Tollywood Drugs Case: టాలీవుడ్ డ్రగ్స్ కేసు మరోసారి చర్చనీయాంశమైంది. కేసు దర్యాప్తునకు రాష్ట్ర ప్రభుత్వం సహకరించడం లేదని హైకోర్టుకు ఎన్ఫోర్స్మెంట్ డైరెక్టరేట్ ఫిర్యాదు చేసింది. డ్రగ్స్ కేసును ఈడీ, సీబీఐ, ఎన్సీబీ వంటి కేంద్ర దర్యాప్తు సంస్థలకు అప్పగించాలని 2017లో పీసీసీ అధ్యక్షుడు రేవంత్ రెడ్డి దాఖలు చేసిన ప్రజా ప్రయోజన వ్యాజ్యంపై ప్రధాన న్యాయమూర్తి జస్టిస్ సతీష్ చంద్రశర్మ ధర్మాసనం ఇవాళ మరోసారి విచారణ జరిగింది. కీలక వ్యక్తుల ప్రమేయం ఉన్న డ్రగ్స్ కేసులను రాష్ట్ర ప్రభుత్వ దర్యాప్తు సంస్థలు సమర్థంగా విచారణ జరపడం లేదని.. కేంద్ర సంస్థలకు అప్పగించాలని రేవంత్ తరఫున న్యాయవాది రచనారెడ్డి కోరారు. తమకు అవసరమైన దస్త్రాలు, సమర్పించేలా ఎక్సైజ్ శాఖను ఆదేశించాలని ఉన్నత న్యాయస్థానాన్ని కోరింది. ఎన్ఫోర్స్ మెంట్ డైరెక్టరేట్ జాయింట్ డైరెక్టర్ అభిషేక్ గోయల్ ఆన్లైన్ విచారణలో నేరుగా కోర్టుకు వివరించారు. తాము అడిగిన వివరాలను ఎక్సైజ్ శాఖ ఇవ్వడం లేదని.. కోర్టు నుంచి తీసుకోవాలని చెబుతోందని ఈడీ జేడీ తెలిపారు. మరోవైపు తాము కోరుతున్న దస్త్రాలు లేవని.. దర్యాప్తు అధికారులు సమర్పించలేదని విచారణ కోర్టులు చెబుతున్నాయని అభిషేక్ గోయల్ వివరించారు. ఎఫ్ఐఆర్లు, ఛార్జ్ షీట్లు, తమ వద్ద ఇతర దస్త్రాలన్నీ ఈడీకి ఇచ్చామని ప్రభుత్వ ప్రత్యేక న్యాయవాది సంజీవ్ కుమార్ తెలిపారు.
ఈడీకి సహకరించాలి..
వాదనలు విన్న హైకోర్టు.. ఈడీకి వివరాలు ఇవ్వకపోవడం తగదని.. విచారణకు సహకరించాలని రాష్ట్ర ప్రభుత్వానికి స్పష్టం చేసింది. మాదకద్రవ్యాలు యువతను అతలాకుతలం చేస్తున్నాయని.. దేశ ప్రయోజనాలను దృష్టిలో ఉంచుకొని ఎన్ఫోర్స్ మెంట్ డైరెక్టరేట్కు సహకరించాలని తెలిపింది. డ్రగ్స్ కేసు విచారణకు ఈడీ సరైన సంస్థేనని అభిప్రాయపడింది. . ఈడీ దరఖాస్తు చేస్తే 15 రోజుల్లో వివరాలు ఇవ్వాలని విచారణ కోర్టులను ఉన్నత న్యాయస్థానం ఆదేశించింది. హైకోర్టు కేసుతో ప్రమేయం ఉన్న వారి కాల్ డేటా సహా అన్ని వివరాలను ఎన్ ఫోర్స్ మెంట్ డైరెక్టరేట్కు నెల రోజుల్లో అప్పగించాలని ప్రభుత్వాన్ని ఆదేశిస్తూ తీర్పు వెల్లడించింది. ఈడీ దరఖాస్తు చేస్తే తమ వద్ద సమాచారం, పత్రాలు ఇవ్వాలని డ్రగ్స్ కేసులను విచారణ చేస్తున్న కోర్టులను కూడా ఉన్నత న్యాయస్థానం ఆదేశించింది. తమ ఆదేశాలను పాటించకపోతే తీవ్రంగా పరిగణనలోకి తీసుకుంటామని హైకోర్టు హెచ్చరించింది. దర్యాప్తునకు అవసరమైన వివరాలు, దస్త్రాలు ఇవ్వకపోతే.. మళ్లీ తమను సంప్రదించవచ్చునని ఈడీకి హైకోర్టు సూచించింది. ఇప్పటికే ఈడీ దర్యాప్తు కొనసాగుతున్నందున... ఇతర కేంద్ర దర్యాప్తు సంస్థలకు కేసును అప్పగించాల్సిన అవసరం లేదంటూ రేవంత్ రెడ్డి పిల్పై విచారణను ముగించింది.
ఇదీ చదవండి:
