అభివృద్ధి పనులు, ప్రాజెక్టుల నిర్మాణం కోసం చేపట్టే భూసేకరణ కారణంగా నిర్వాసితులయ్యేవారికి కల్పించే పునరావాస పథకం కంటి తుడుపు చర్యగా మిగలరాదని రాష్ట్ర ప్రభుత్వానికి హైకోర్టు స్పష్టం చేసింది. కాగితాల్లో పథకం ఘనంగా ఉండి ఆచరణలో కనిపించకపోతే ప్రయోజనం లేదని పేర్కొంది.
నిర్వాసితులు బాధితులవుతున్నారు...
కాళేశ్వరం ప్రాజెక్టులో భాగంగా మల్లన్నసాగర్ రిజర్వాయర్ కోసం భూసేకరణ చేపట్టారు. దానిలో నిర్వాసితులైన రైతులకు కేంద్ర భూసేకరణ చట్టం ప్రకారం పునరావాసం కల్పించలేదని పౌర హక్కుల సంఘం హైకోర్టులో పిటిషన్ దాఖలు చేసింది. మల్లన్నసాగర్, కొండపోచమ్మ ప్రాజెక్టు ప్రాంతాల్లో నిర్వాసితులకు పట్టాలు ఇచ్చామని అదనపు అడ్వకేట్ జనరల్ జె. రామచంద్రరావు వివరించారు. పునరావాస పథకానికి సంబంధించి ప్రభుత్వం జీవోలు జారీ చేసిందని, నిర్వాసితులు బాధితులు కాకుండా చూస్తున్నామని పేర్కొన్నారు.
8వేలకు 284 మందికి మాత్రమే...
ప్రభుత్వం చెబుతున్నదానికి, అమలుకు పొంతన లేదని పిటిషనర్ తరఫు న్యాయవాది తెలిపారు. నిజనిర్ధరణ కమిటీ వెళ్లి పరిశీలిస్తే రైతల జీవితాలు, జీవనోపాధి దెబ్బతిన్నట్లు తేలిందన్నారు. ముత్తిరాసిపల్లిలో అధికారులు, బాధితుల వివరాల ప్రకారం 8 వేల మందికి గాను, కేవలం 284 మందికి మాత్రమే పునరావాస పథకం ప్రయోజనాలు అందినట్లు దృష్టికొచ్చిందన్నారు. న్యాయం చేయాలని కోరిన రైతులను అరెస్టు చేసి పోలీస్ స్టేషన్ల చుట్టూ తిప్పుతున్నారని... భూమిని స్వాధీనం చేసుకొని వారిని బలవంతంగా నిర్వాసితులను చేశారని వాదనలు వినిపించారు. పునరావాసం, పునర్నిర్మాణం పూర్తయ్యేదాకా పనులు నిలిపివేస్తూ మధ్యంతర ఉత్తర్వులు ఇవ్వాలని కోరారు.
జూన్కు వాయిదా వేసిన న్యాయస్థానం...
ఉన్నత న్యాయస్థానం జోక్యం చేసుకుంటూ తగిన ఆధారాలు, వివరాలతో కౌంటర్ దాఖలు చేయాలని సంబంధిత ప్రభుత్వ శాఖకు నోటీస్ జారీ చేస్తూ విచారణను జూన్కు వాయిదా వేసింది.
ఇదీ చూడండి: శ్రమజీవుల స్వేచ్ఛాపథం... మేడే
