డెంగీ జ్వరం వస్తే.. శరీరంలో ప్లేట్లెట్ల సంఖ్య పడిపోతుందని తీవ్ర ఆందోళనకు గురవుతాం. డెంగీ వచ్చిందని తెలియగానే.. రక్తం ఏర్పాటు చేసుకోవడానికి ఇబ్బందులు పడే వారిని గమనిస్తూనే ఉంటారు. అయితే.. డెంగీ జ్వరం వచ్చినప్పుడు ప్లేట్లెట్లు ఎందుకు తగ్గిపోతాయనే విషయం వైద్యులు సైతం తేల్చలేకపోయారు. డెంగీకి వైద్యం అందిస్తూ ప్రాణాలు పోకుండా కాపాడగల్గుతున్నారు.ప్రపంచ వ్యాప్తంగా ఎన్నో పరిశోధనలు జరుగుతూనే ఉన్నాయి. తాజాగా హైదరాబాద్ కేంద్రీయ విశ్వ విద్యాలయం ప్రొఫెసర్లు ఈ విషయమై పురోగతి సాధించారు. వర్సిటీలోని స్కూల్ ఆఫ్ లైఫ్ సైన్సెస్ విభాగంలోని బయో టెక్నాలజీ, బయె కెమిస్ట్రీ ప్రొఫెసర్లు ఎం.వెంకటరమణ, ఎస్.నరేష్ బాబు కలిసి తమ పరిశోధనలో పలు విషయాలు తెలుకుసున్నారు. దాదాపు రెండున్నరేళ్ల పరిశోధన తర్వాత వారు కనుగొన్న విషయాలను జర్నల్ ఆఫ్ వైరాలజీ అనే అమెరికా జర్నల్లో ప్రచురితమైంది.
తేలిన అంశాలివే..
డెంగీ కారక వైరస్లో దాదాపు పది రకాల ప్రొటీన్లు ఉంటాయి. ఇందులో నిర్మాణాత్మక (స్ట్రక్చరల్) ప్రొటీన్లు మూడు కాగా.. మరో ఏడు నిర్మాణాత్మకం కాని (నాన్ స్ట్రక్చరల్) ప్రొటీన్లు. నాన్ స్ట్రక్చరల్ ప్రొటీన్ (ఎన్ఎస్)-3గా పిలిచే ప్రొటియేజ్ సమస్యకు కారణమవుతుంది. ఇది నేరుగా రక్తంలోని కణాల్లోకి వెళ్లి వాటిలోని మైటోకాండ్రియాను నిర్వీర్యం చేస్తోంది. మైటోకాండ్రియాలో ప్రొటీన్ను పట్టి ఉంచే వ్యవస్థ ఉంటుంది. ప్రొటీన్ కార్యకలాపాలను వైరస్ ప్రభావితం చేసి.. వాటి పనితీరును దెబ్బ తీస్తుంది. ఫలితంగా ప్లేట్లెట్స్ వృద్ధి కావు.
డెంగీ వైరస్ తరహాలోనే కొవిడ్-19కు కారణమైన నోవల్ కరోనా వైరస్ సైతం కణంలోని మైటోకాండ్రియాపై ప్రభావం చూపిస్తుందని హెచ్సీయూ ప్రొఫెసర్లు భావిస్తున్నారు. డెంగీ సోకిన వ్యక్తుల్లో చాలా సందర్భాల్లో పరిస్థితి విషమించి హెమరేజిక్, షాక్ సిండ్రోమ్ వస్తున్నాయి. ప్రొటీయేజ్ను లక్ష్యంగా చేసుకొని కొత్త ఔషదాలు తయారు చేస్తే.. డెంగీ కారణంగా వచ్చే విషమ పరిస్థితులకు అడ్డుకట్ట వేసేందుకు వీలవుతుందని భావిస్తున్నామని, ఇప్పటి వరకు ప్రొటియేజ్ను అడ్డుకునే ఔషధాలు రాలేదని.. ఈ పరిశోధన ద్వారా కొత్త మందులు తయారు చేసేందుకు వీలవుతుందని హెచ్సీయూ ప్రొఫెసర్లు వెంకటరమణ, నరేష్ బాబులు తెలిపారు.
ఇవీ చూడండి: పచ్చని పండుగ: హరిత తెలంగాణే లక్ష్యం... ప్రతిమొక్కనూ బతికిద్దాం
