భూముల మార్కెట్ ధరల సవరణకు ప్రభుత్వ అనుమతి

తెలంగాణాలో భూములకు కొత్త మార్కెట్ విలువలు అమల్లోకి తెచ్చేందుకు పదిరోజులే గడువు ఉండటంతో ఈ దిశగా ప్రయత్నాలు ముమ్మరం చేశారు. రెండు రోజుల్లో ప్రక్రియను పూర్తి చేసి ప్రభుత్వ ఆమోదానికి పంపనున్నారు. రాష్ట్ర ప్రభుత్వం రిజిస్ట్రేషన్​కు ప్రాతిపదికగా ఉండే మార్కెట్ విలువలను డిమాండ్, ప్రాంతాల వారీగా వినూత్న విధానానికి శ్రీకారం చుడుతున్నారు. బాగా విలువ ఉండి డిమాండ్ ఉన్న ప్రాంతాల్లో మార్కెట్ విలువలను ప్రత్యేకంగా నిర్ణయించనున్నారు. ప్రధానంగా హైదరాబాద్ చుట్టు పక్కల ప్రాంతాల్లో వ్యవసాయ, వ్యవసాయేతర ఆస్తులకు భారీ డిమాండ్ కొనసాగుతుండటంతో పాటు రిజిస్ట్రేషన్ చేసుకుంటున్న విలువ, ప్రభుత్వం నిర్ణయించిన మార్కెట్ విలువకు మధ్య భారీ అంతరం ఉండటంతో దీన్ని హేతుబద్ధీకరించాలని ప్రభుత్వం నిర్ణయించింది.

పెరిగిన రాబడి

వ్యవసాయ భూముల విలువ ప్రస్తుతం ఉన్నదానికంటే 50 శాతం, ఖాళీ స్థలాల మార్కెట్ విలువ 35 శాతం, అపార్ట్​మెంట్ల ఫ్లాట్ల విలువ 25 శాతం పెంచేలా కసరత్తు జరుగుతోంది. బాగా డిమాండ్ ఉన్న ప్రాంతాల్లో మార్కెట్ విలువను ప్రత్యేకంగా గుర్తించి 40 శాతం పైగా పెంచనున్నారని విశ్వసనీయ సమాచారం. ఉమ్మడి రాష్ట్రంలో 2013 లో వ్యవసాయ, వ్యవసాయేతర ఆస్తుల మార్కెట్ విలువలను సవరించారు. తెలంగాణ రాష్ట్రం వచ్చిన తర్వాత మొదటి సారిగా 2021 జులైలో మార్కెట్ విలువలను సవరించడంతో పాటు రిజిస్ట్రేషన్ ఛార్జీలను పెంచారు. మార్కెట్ ధరలు, రిజిస్ట్రేషన్ ఛార్జీలు పెంచిన నేపథ్యంలో ఏటా సుమారు రూ.3000 కోట్ల నుంచి రూ.3500 కోట్ల వరకు అదనపు రాబడిని అంచనా వేసింది. గత ఎనిమిది నెలల్లో రిజిస్ట్రేషన్ల సంఖ్య భారీగా పెరగడంతో పాటు రాబడి పెరిగింది.

మార్కెట్​ ధరలు కీలకం

ప్రస్తుత ఆర్థిక సంవత్సరంలో ఇప్పటికే వ్యవసాయేతర ఆస్తుల రిజిస్ట్రేషన్ల సంఖ్యే తొమ్మిది లక్షలు దాటింది. ఏడేళ్ల తర్వాత వ్యవసాయ, వ్యవసాయేతర ఆస్తుల మార్కెట్ విలువలు పెంచిన వాస్తవంగా ఉన్న బహిరంగ మార్కెట్ ధరలకు పొంతనలేదని గుర్తించింది. దీంతో రిజిస్ట్రేషన్​కు ప్రాతిపదికగా ఉండే మార్కెట్ విలువల్లో మరింత హేతుబద్ధత ఉండాలని ప్రభుత్వం భావిస్తోంది. ఇటీవల ప్రభుత్వం హెచ్ఎండీఏ ద్వారా భూములను విక్రయించినపుడు పలికిన ధరలతో పాటు భారీగా పెరిగిన వ్యవసాయేతర ఆస్తుల రిజిస్ట్రేషన్ విలువ నేపథ్యంలో ప్రభుత్వ మార్కెట్ ధరలు కీలకంగా భావిస్తోంది.

8 నెలల్లోనే మరోమారు సవరణ

ప్రభుత్వం నిర్ణయించిన మార్కెట్ విలువ తక్కువగా ఉండగా బహిరంగ మార్కెట్లో ఎక్కువ మొత్తానికి కొని తక్కువ రిజిస్ట్రేషన్ ఛార్జీలతో రిజిస్ట్రేషన్లు జరుగుతున్నాయని ఈ వ్యవహారంలో భారీ మొత్తంలో అనధికారికంగా చేతులు మారుతోందనే అంశాన్ని ప్రభుత్వం పరిగణనలోకి తీసుకున్నట్లు తెలిసింది. ఏడేళ్ల తర్వాత మార్కెట్ విలువలు పెంచినా వాస్తవ పరిస్థితులకు చేరువ కాలేదని.. ఈ నేపథ్యంలోనే ఎనిమిది నెలల్లోనే మరోమారు సవరించాల్సి వస్తోందని ప్రభుత్వ ఉన్నతాధికారి ఒకరు స్పష్టం చేశారు. సాధారణంగా రెండేళ్లకు ఒక సారి మార్కెట్ విలువల్ని సవరిస్తే ఈ పరిస్థితి ఉండేది కాదని.. తాజాగా స్థిర పరచి క్రమం తప్పకుండా సవరణ ప్రక్రియ చేసేలా చర్యలు తీసుకోనున్నట్లు వివరించారు. భవిష్యత్తులో ప్రభుత్వ రాబడుల్లో రిజిస్ట్రేషన్ల రాబడి కీలకంగా ఉంటుందని అభిప్రాయపడ్డారు.

వేర్వేరు మార్కెట్ రేట్లు

ప్రస్తుత విధానం ఇది వ్యవసాయ భూములకు సంబంధించి రాష్ట్ర వ్యాప్తంగా నాలుగు ప్రాంతాలను పరిధులుగా నిర్ణయించి ప్రతి పరిధిలోనూ కనీస ధరతో పాటు తక్కువ శ్రేణి, మధ్య శ్రేణి, గరిష్ట శ్రేణిని విలువలు అమల్లో ఉంటాయి. అదే విధంగా ఖాళీ స్థలాలకు సంబంధించి రెవెన్యూ గ్రామాలు, మండల కేంద్రాలు, 50 వేల జనాభాకంటే తక్కువ ఉన్న పురపాలక పట్టణాలు, గ్రేడ్-1 పురపాలక పట్టణాలు, నగరపాలక సంస్థలు, హెచ్ఎండీఏ పరిధి -1, హెచ్ఎండీఏ పరిధి -2, జీహెచ్ఎంసీ పరిధిలో వేర్వేరు మార్కెట్ విలువలు ఉన్నాయి. అదే విధంగా ఫ్లాట్లు, అపార్ట్​మెంట్లకు సంబంధించి కూడా గ్రామ పంచాయతీలు, పురపాలక సంఘాలు- నగరపాలక సంస్థలు, హెచ్ఎండీఏ పరిధి, జీహెచ్ఎంసీ పరిధి ఇలా వివిధ వర్గీకరణలు ఉన్నాయి. వీటిలో కూడా డోర్ నెంబర్లు, వీధులు ప్రాతిపదికగా వేర్వేరు మార్కెట్ రేట్లు అమల్లో ఉన్నాయి.

ఇదీ చదవండి: