సికింద్రాబాద్ బాలంరాయ్కి చెందిన నాగమల్లేశ్ తన ఫోన్లో గూగుల్పే ద్వారా తెలిసిన వారికి డబ్బు పంపించాడు. ఆ డబ్బులు వారి ఖాతాలో జమ కాలేదు. దాంతో కస్టమర్ కేర్ కోసం అంతర్జాలంలో వెతికి ఓ నంబరుకు ఫోన్ చేశాడు. తర్వాత ఓ వ్యక్తి ఫోను చేయగా... సమస్యను వివరించాడు. వెంటనే క్విక్ సపోర్ట్ యాప్ను డౌన్లోడ్ చేయించి.. నాగమల్లేశ్ ఖాతా నుంచి రూ.2.20 లక్షలు కొట్టేశారు.
రుణం ఇస్తామని..
మరో కేసులో సికింద్రాబాద్కు చెందిన శివరాజుకు రుణం ఇస్తామని ఓ వ్యక్తి ఫోన్ చేశాడు. వివరాలు తెలుసుకుని 1.50 లక్షలు వరకు ఇచ్చే వెసులుబాటు ఉందని నమ్మించాడు. ముందు జీఎస్టీ అని రూ.24 వేలు, ఎన్వోసీ కోసమని రూ.45 వేలు ఇలా మొత్తం 1.50 లక్షలు లాగేశాడు. ఆ తర్వాత ఫోన్ బంద్ చేశాడు. బాధితుడు న్యాయం చేయాలంటూ పోలీసులను ఆశ్రయించాడు.
పేటీఎం, కేవైసీ అప్డేట్
సికింద్రాబాద్ పద్మారావునగర్కు చెందిన దిలీప్ కుమార్కు గుర్తు తెలియని వ్యక్తి ఫోన్ చేశాడు. పేటీఎం, కేవైసీ అప్డేట్ చేసుకోవాలని సూచించాడు. అందుకు తాను సంసిద్ధత వ్యక్తం చేయగా.. ఎనీ డెస్క్ యాప్ను డౌన్లౌడ్ చేయించారు. కొద్ది సేపట్లోనే ఖాతాలోంచి రూ.94 వేలు పోయాయి. వెంటనే బాధితులు పోలీసు సైబర్ క్రైమ్ పోలీసులకు ఫిర్యాదు చేశాడు.
బ్యాంక్ అధికారి అంటూ...
బోయినపల్లికి చెందిన రమణకు బ్యాంక్ అధికారి అంటూ గుర్తు తెలియని వ్యక్తి ఫోన్ చేశాడు. ఖాతాను అప్డేట్ చేసుకోవాలని సూచించి.. పూర్తి వివరాలు తెలుసుకున్నాడు. కొద్దిసేపటిలో ఖాతాలోంచి రూ.1.25 లక్షలు డ్రా అయినట్లు మేసేజ్ రావడం వల్ల బాధితుడు వెంటనే పోలీసులను ఆశ్రయించాడు.
గూగుల్పే పేరుతో..
సికింద్రాబాద్కు చెందిన సాలోమన్ రాజు గూగుల్పే సరిగా పనిచేయకపోవడం వల్ల.. కస్టమర్ కేర్కు ఫోన్ చేశాడు. మొదట్లో ఎవరూ స్పందించలేదు. తర్వాత కస్టమర్ కేర్ నుంచి మాట్లాడుతున్నామని చెప్పి రూ. 86 వేలు దోచేశారు. బాధితుల ఫిర్యాదు మేరకు హైదరాబాద్ సైబర్ క్రైమ్ పోలీసులు కేసు నమోదు చేసుకుని దర్యాప్తు చేస్తున్నారు.
ఇదీ చూడండి : 'ప్రజా వినతులు స్వీకరించేందుకు కేటీఆర్ సమయం కేటాయించాలి'
