GHMC Commissioner on Election Review : ఎన్నికలు సజావుగా సాగేందుకు.. పార్టీలు సహకరించాలి : రొనాల్డ్ రోస్

GHMC Commissioner Ronald Rose on Election Review : రాష్ట్రంలో ఎన్నికల షెడ్యూల్ విడుదలైన నేపథ్యంలో.. ఎన్నికల నిర్వహణపై పలు రాజకీయ పార్టీల ప్రతినిధులతో గ్రేటర్ హైదరాబాద్ ఎన్నికల అధికారి రొనాల్డ్ రోస్ సమీక్ష నిర్వహించారు. మంగళవారం జరిగిన ఈ సమావేశంలో ఎన్నికల విధివిధానాలను వివరిస్తూనే.. ఎన్నికల కోడ్ ఉల్లంఘనలపై కఠిన చర్యలు తీసుకోనున్నట్లు తెలిపారు. ఓటర్లకు ఈవీఎంలపై అవగాహన కోసం 397 బస్ స్టేషన్లలో అవగాహన కార్యక్రమాన్ని చేపట్టామని.. 16 ప్రదేశాల్లో ఈవీఎం, వీవీ ప్యాట్​లపై 15,158 మందికి అవగాహన కల్పించామన్నారు.

GHMC Commissioner on City Election Review : ఎన్నికల ప్రక్రియను ప్రశాంతంగా నిర్వహించేందుకు అన్ని రాజకీయ పార్టీల ప్రతినిధులు సహకరించాలని హైదరాబాద్ జిల్లా ఎన్నికల అధికారి, బల్దియా కమిషనర్ రొనాల్డ్ రోస్ అన్నారు. ఎన్నికల షెడ్యూల్ విడుదలైన నేపథ్యంలో జీహెచ్ఎంసీ ప్రధాన కార్యాలయంలో పలు రాజకీయ పార్టీల ప్రతినిధులతో ఎన్నికల నిర్వహణపై సమీక్ష నిర్వహించారు. ఎన్నికల సంఘం మార్గదర్శకాలు, షెడ్యూల్​ను అనుసరించి నవంబర్ 3న ఎన్నికల నోటిఫికేషన్(Election Notification) వెల్లడించనున్నట్లు తెలిపారు. నవంబర్ 3వ తేదీ నుంచి 10వ తేదీ వరకు నామినేషన్ల స్వీకరించడం జరుగుతుందని.. 30వ తేదీన పోలింగ్, డిసెంబర్ 3న కౌంటింగ్ నిర్వహించనున్నట్లు పేర్కొన్నారు.

List of Polling Stations in Hyderabad : జీహెచ్ఎంసీ వ్యాప్తంగా 1,688 లొకేషన్లలో 3,986 పోలింగ్ స్టేషన్లను ఏర్పాటు చేయడం జరిగిందని హైదరాబాద్ జిల్లా ఎన్నికల అధికారి రొనాల్డ్ రోస్ తెలిపారు. హైదరాబాద్ కమిషనరేట్ పరిధిలో 3,931 ఉండగా.. రాచకొండ కమిషనరేట్​లో 4, సైబరాబాద్ కమిషనరేట్​లో 51 పోలింగ్ స్టేషన్లు ఉన్నాయన్నారు. ఎన్నికల నిర్వహణకు 34,452 పోలింగ్ స్టాఫ్, పోలీస్ సిబ్బందిని(Police Personnel) ఏర్పాటు చేయడం జరిగిందని తెలిపారు.

EVM/VVPT Awareness Program : ఎన్నికల్లో వినియోగించే ఈవీఎమ్​ల ఫస్ట్ లెవల్ చెకప్ పూర్తి చేసి విక్టరీ ప్లే గ్రౌండ్​లో భద్రపరచడం జరిగిందని తెలిపారు. ఈవీఎంపై అవగాహన కోసం వివిధ బస్ స్టేషన్లలో అవగాహన కార్యక్రమాన్ని చేపట్టామని.. 16 ప్రదేశాలలో ఈవీఎమ్, వీవీ ప్యాట్​లపై 15,158 మందికి అవగాహన కల్పించడం జరిగిందన్నారు. 15 మొబైల్ వ్యాన్ల ద్వారా ఈవీఎం, వీవీ ప్యాట్​లపై గ్రేటర్ హైదరాబాద్​లోని 15 నియోజకవర్గాల్లో విస్తృతంగా అవగాహన కార్యక్రమాలను నిర్వహించడం జరిగిందన్నారు.

ఓటర్ల సందేహాలు నివృత్తి చేయడానికి జీహెచ్ఎంసీలో కంట్రోల్ రూమ్​ను ఏర్పాటు చేశామన్నారు. ఇందులో భారత ఎన్నికల సంఘం 1950 టోల్ ఫ్రీ నెంబర్, 1800-599-2999 నంబర్లు 24 గంటల పాటు పనిచేస్తాయన్నారు. సీ-విజిల్ యాప్ ద్వారా మోడల్ కోడ్​లో ఉల్లంఘన జరిగిన ఫిర్యాదులను 100 నిమిషాలలోపు పరిష్కరించి యాప్​లో ఉంచుతామని తెలిపారు.

సువిధా సెంటర్ నుంచి సింగిల్ విండో ద్వారా పొలిటికల్ పార్టీలు, అభ్యర్థులు వినియోగించే నాన్ కమర్షియల్, రిమోట్, కంట్రోల్ ఎయిర్ ఫోర్స్, హెలీ ప్యాడ్స్​లకు అనుమతి తీసుకోవాలన్నారు. పబ్లిక్ మీటింగ్స్(Public Meetings), ర్యాలీలు, లౌడ్ స్పీకర్లకు అనుమతి తప్పనిసరని రొనాల్డ్ రోస్ అన్నారు. జిల్లాలోని ప్రతి నియోజకవర్గంలో 6 టీమ్​లతో ఫ్లయింగ్ స్క్వాడ్​లను ఏర్పాటు చేశామన్నారు. పొలిటికల్ పార్టీలు చేసే ర్యాలీలు, మీటింగ్​లను వీడియోగ్రఫీ చేయడానికి 15 నియోజకవర్గాలలో 15 వీడియో సర్వేటీమ్​లను ఏర్పాటు చేశామని తెలిపారు.

Election Code in Telangana 2023 : సిటీ పోలిస్ కమిషనర్ ఆనంద్ మాట్లాడుతూ.. ఎన్నికల నేపథ్యంలో ఎన్​ఫోర్స్​మెంట్ విస్తృత తనిఖీలు చేపట్టిందన్నారు. ఎన్నికల నియమావళి అమలులో ఉన్నందున రాజకీయ పార్టీలు ఓటర్లకు ఉచితంగా అందించే వస్తువులపై, అక్రమ మద్యం రవాణా, నగదు ప్రవాహంపై వేగవంతమైన చర్యలు తీసుకుంటామని తెలిపారు. హైదరాబాద్ నగరంలో 1587 సమస్యత్మాక పోలింగ్ స్టేషన్లను గుర్తించడం జరిగిందని తెలిపారు.

ఇంటిగ్రేటెడ్ చెక్ పోస్టుల ద్వారా నార్కోటిక్స్​పై కఠిన చర్యలు తీసుకుంటామని తెలిపారు. ఎక్సైజ్ కమిషనర్(Commissioner of Excise), కేంద్రరాష్ట్ర ప్రభుత్వాలకు సంబంధించిన కస్టమ్ నార్కోటిక్ ఈడీ అధికారులతో 24 గంటల పాటు పని చేసే విధంగా.. జిల్లాలో, 18 ప్రదేశాలలో ఏర్పాటు చేస్తున్నట్లు సీపీ తెలిపారు. రానున్న రోజుల్లో ఇంకా కఠినంగా వ్యవహరించడం జరుగుతుందన్నారు.