జ్వరాల బారిన పడి రాష్ట్ర ప్రజలు విలవిల్లాడుతున్నారు. డెంగీ సహా వివిధ రకాల వైరల్ ఫీవర్స్ సోకి... ఆస్పత్రులో చేరుతున్న వారి సంఖ్య నానాటికీ పెరుగుతోంది. గత 5 వారాల్లో రాష్ట్ర వ్యాప్తంగా 1348 డెంగీ కేసులు నమోదు కాగా... గత 4 వారాల్లో సుమారు 1.31 లక్షల మంది విష జ్వరాల భారిన పడినట్టు అధికారిక గణాంకాలు చెబుతున్నాయి. ఇక జ్వరాల బారిన పడుతున్న వారిలో సుమారు 50 శాతం మంది చిన్నారులే కావడం గమనార్హం. మరోవైపు జ్వరం వస్తే చాలు డెంగీ అని భయపడి ప్రజలు ఆస్పత్రులకు పరుగులు తీస్తున్నారు. వైద్యుల సలహాలేకపోయినా పరీక్షల కోసం పట్టుబడుతున్నట్లు సమాచారం.
ప్రైవేటు ఆస్పత్రుల్లోనూ అంతే...
జ్వరాల తీవ్రత అధికంగా ఉండటం వల్ల నగరంలోని గాంధీ, ఉస్మానియా, ఫీవర్ ఆస్పత్రులకు ప్రతిరోజు 2 వేలకు పైగా ఓపీ కోసం వస్తున్నారు. ఇక పిల్లల అప్సత్రి నిలోఫర్లో అయితే భారీస్థాయిలో క్యూలు కడుతున్నారు. ఒక్కో పడకపై ఇద్దరు చిన్నారులను ఉంచి చికిత్స అందించాల్సిన పరిస్థితి. ఇక గాంధీ ఉస్మానియాల్లోనూ పడకలు చాలక... నెలపైనే పడుకోబెట్టి వైద్యులు సేవలు అందిస్తున్నారు. కేవలం ఇది ప్రభుత్వాసుపత్రుల్లోనే కాదు ప్రైవేటు ఆస్పత్రుల్లోనూ ఇదే పరిస్థితి. సమస్య తీవ్రతను గుర్తించిన సర్కారు ప్రభుత్వాసుపత్రుల్లో ఉదయం, సాయంత్రం, సెలవు దినాలు, ఆదివారాల్లో కూడా ఓపీ సేవలను అందిస్తున్నప్పటికీ... వైద్య పరీక్షల కిట్లు, మందులు అందించడంలో విఫలమైంది.
జ్వరం రాగానే డెండీ పరీక్షలొద్దు
జ్వరాల తీవ్రత ఎక్కువగా ఉన్నప్పటికీ మంచి పౌష్టిక ఆహారం, కాచి చల్లార్చిన నీటిని తాగడం, వ్యక్తిగత పరిశుభ్రతతోనే ఆరోగ్యాన్ని కాపాడుకోవచ్చని వైద్యులు చెబుతున్నారు. చిన్న జ్వరం వచ్చినా డెంగీ అని భయపడి అన్ని పరీక్షలు చేయించుకోవడం వృథా అంటున్నారు. మూడు నుంచి 4 రోజుల తగ్గకుండా జ్వరం తీవ్రత ఎక్కువగా ఉంటేనే... డెంగీ పరీక్షలు చేయించుకోవాల్సిన అవసరం ఉంటుందని సూచిస్తున్నారు.
ఇవీ చూడండి: నిరాశ వ్యర్థం... నవోదయం తథ్యం: మోదీ
