నేడు రాష్ట్రానికి ఆర్థిక సంఘం

నేటి నుంచి నాలుగు రోజుల పాటు రాష్ట్రంలో 15వ ఆర్థిక సంఘం పర్యటించనుంది. వివిధ అభివృద్ధి పనులను కమిషన్​ పరిశీలించనుంది.

ప్రముఖ ఆర్థిక వేత్త ఎన్​కే సింగ్​ నేతృత్వంలోని 15వ ఆర్థిక సంఘం నేడు రాష్ట్రానికి రానుంది. నేటి నుంచి నాలుగు రోజుల పాటు ఆర్థిక సంఘం రాష్ట్రంలో పర్యటించనుంది. రాష్ట్ర ప్రభుత్వం ప్రతిష్టాత్మకంగా నిర్మిస్తోన్న కాళేశ్వరం ప్రాజెక్ట్​తో పాటు మిషన్ భగీరథ పనులను సభ్యులు పరిశీలిస్తారు. రాష్ట్ర ఆర్థిక స్థితిగతులతో పాటు నీటిపారుదల, మిషన్ కాకతీయపై కమిషన్​కు రాష్ట్ర ప్రభుత్వం ప్రత్యేకంగా వివరించనుంది.

ఈరోజు ఉదయం కాళేశ్వరం ప్రాజెక్ట్​లో భాగంగా మేడిగడ్డ వద్ద నిర్మిస్తున్న ఆనకట్ట పనులను పరిశీలిస్తారు. జగిత్యాల జిల్లాలో ఉన్న ఆరో ప్యాకేజీని బృందం సందర్శిస్తుంది. ఆ తర్వాత సిరిసిల్ల వెళ్లి అక్కడ మిషన్ భగీరథ ప్రాజెక్టును పరిశీలిస్తారు. కమిషన్ ఛైర్మన్ ఎన్​కే సింగ్ రేపు హైదరాబాద్ రానున్నారు. స్థానిక సంస్థల ప్రతినిధులు, రాజకీయ పార్టీల, వివిధ వర్గాల అభిప్రాయాలను కమిషన్​ సేకరించనుంది. 19న ముఖ్యమంత్రి కేసీఆర్​తో పాటు రాష్ట్ర ప్రభుత్వ అధికారులతో ఆర్థిక సంఘం భేటీ కానుంది.
ఈ పర్యటనలో నగరంలోని చార్మినార్ సహా ప్రఖ్యాత ప్రాంతాలను కమిషన్ సందర్శిస్తుంది. 20న ఆర్థిక సంఘం బృందం క్షేత్రస్థాయి పర్యటనకు వెళ్లే అవకాశం ఉంది.