గడిచిన కొన్ని నెలల్లో అనేక మార్లు న్యాయస్థానాల నుంచి అక్షింతలు వేయించుకున్న పోలీస్‌శాఖ ఏపీ అమరావతి రైతులకు సంకెళ్లు వేసి జైలుకు తీసుకెళ్లడం ద్వారా మరోసారి విమర్శలపాలైంది. ఈనెల 23న 3 రాజధానాలకు మద్దతుగా ఆందోళన చేసేందుకు ఆటోల్లో వెళ్తున్న వారిని కృష్ణాయపాలెం వద్ద కొందరు దళిత రైతులు అడ్డుకున్నారు. దీనిపై వారు ఫిర్యాదు చేశారు.
అదే రోజు పోలీసులు 11 మందిపై ప్రాథమిక విచారణ జరపడం, ఎస్టీ, ఎస్టీ అట్రాసిటీ కింద కేసు నమోదు చేయడం, 24 గంటల వ్యవధిలోనే అదుపులోకి తీసుకోవడం చకాచకా జరిగిపోయాయి. ఈనెల 24న ఏడుగుర్ని అరెస్టు చేసి నరసరావుపేట సబ్‌జైలుకు తరలించారు. అక్కడ కొవిడ్ పరీక్షలు చేసి గుంటూరు జిల్లా జైలుకు తీసుకొచ్చారు. వేర్వేరు కేసుల్లో నిందితులుగా ఉన్నవారితో కలిపి ఆర్టీసీ బస్సులో తరలించారు. ఆ సమయంలో ఇద్దరేసి రైతులకు కలిపి బేడీలు వేయడం దుమారం రేపింది. ఉగ్రవాదులు, కరుడుగట్టిన నేరస్థులకు వేసే బేడీలు అన్నంపెట్టే అన్నదాతలకు వేయడం మాజీ అధికారులను విస్మయపరుస్తోంది. ఇది సుప్రీంకోర్టు తీర్పులకు విరుద్ధమని చెప్తున్నారు.
ఈ కేసులో పోలీసుల తీరులో అడుగడుగునా ఆక్షేపణలు వినిపిస్తున్నాయి. అరెస్టు చేసిన ఏడుగురిలో ఐదుగురు ఎస్సీ రైతులే. ఎస్సీలపైనే అట్రాసిటీ చట్టం కింద కేసులు ఎలా పెట్టారో అర్థం కావడం లేదని విశ్రాంత పోలీసు అధికారులు విస్మయం వ్యక్తం చేస్తున్నారు. ఎస్కార్ట్‌ సిబ్బందికి సంకెళ్లు వేసేటప్పుడు అనుసరించాల్సిన విధి, విధానాలపై ఎప్పటికప్పుడు అధికారులు.. సిబ్బందికి అవగాహన కల్పించాలని సూచిస్తున్నారు.
రైతులకు బేడీలు దురదృష్టకరమని..గుంటూరు గ్రామీణ ఎస్పీ విశాల్ గున్ని విచారం వ్యక్తం చేసినా.. చేతులుకాలాక ఆకులు పట్టుకుని ప్రయోజనం ఏంటని మాజీలు ప్రశ్నిస్తున్నారు.
ఇవీచూడండి: కరోనా బాధితుల్లో విటమిన్-డి లోపం!
