శీతాకాలంలో కురుస్తున్న భారీ వర్షాలు పైర్లను కబళిస్తున్నాయి. చేతికొచ్చే దశలో, పూతతో నిండుగా ఉన్న పంటపై కురుస్తున్న వానలు రైతులకు కన్నీరు మిగుల్చుతున్నాయి. రాష్ట్రంలో ఖరీఫ్ దశలో మొత్తం కోటీ 11 లక్షల ఎకరాల్లో పంటలు సాగవగా వాటిలో ఇప్పటివరకు పదో వంతు కోతలు కూడా పూర్తికాలేదు.
నేలరాలిపోయిన ప్రధాన పంట
ఖరీఫ్లో పత్తిని ప్రధాన పంటగా 46 లక్షల ఎకరాల్లో రైతులు వేశారు. వానలు లేక మొదట్లో కాస్తా ఇబ్బంది పెట్టినా దిగుబడులు బాగానే ఉన్నాయని రైతులు సంతోషపడే సమయంలో... వర్షాలు వచ్చి దుఖాన్ని మిగులుస్తున్నాయి. గాలివానకు చాలావరకు పత్తికాయలు రాలిపోతున్నాయి. మిగిలిన కాయలు నల్లగా మాడిపోతున్నాయి. వాటి నుంచి వచ్చే పత్తి నాణ్యత లేని గుడ్డిపత్తి అంటూ వ్యాపారులు ధరలను తెగ్గోస్తున్నారు. ఈ సీజన్‌లో పత్తి పంట మద్ధతు ధర క్వింటాకు 5550 కాగా... ప్రస్తుత పరిస్థితిలో క్వింటాకు 3 వేల నుంచి 5 వేలు రావడమే గగనమవుతుంది.
తాలుగింజలతో దిగుబడులు ఎలా?
మొక్కజొన్న కంకుల్లో నీరు చేరి కుళ్లిపోతున్నాయి. సోయాగింజలు రాలిపోతున్నాయి. వరిపైరు నేలవాలుతోంది. పొట్టదశకు వచ్చినందున తాలు గింజలు ఏర్పడి దిగుబడులు తగ్గుతున్నాయని రైతులు ఆందోళన వ్యక్తం చేస్తున్నారు.
భారీ కాదు... అతి భారీవర్షాలు
సాధారణంగా 5 సెంటీమీటర్లకు మించి వర్షం కురిస్తే భారీగా పడినట్లుగా వాతావరణ శాఖ ప్రకటిస్తుంది. కానీ రాష్ట్రంలోని కొన్ని ప్రాంతాల్లో 5 నుంచి 20 సెంటీమీటర్ల దాకా వర్షాలు కురుస్తున్నాయి. ఇటీవల పరకాలలో 24 గంటల వ్యవధిలోనే అత్యధికంగా 19 సెంటీమీటర్ల వర్షం కురిసింది. గత పదేళ్లలో ఎన్నడూ లేనివిధంగా అక్టోబరు రెండోవారంలో అత్యధిక రికార్డు నమోదు చేశాయని వాతవరణశాఖ తెలిపింది. ఈ స్థాయి వర్షాలకు పైర్లు నిలువునా నేలకొరిగిపోతున్నాయి. ఆదిలాబాద్‌ జిల్లాలో రైతులు బాగా నష్టపోయారు. నష్టాలపై అంచనా ఏమీ వేయలేదని జిల్లా వ్యవసాయాధికారి తెలిపారు.
పంటచేలలో నీరు నిలిచి మునిగిపోతే నష్టం వాటిల్లిందని ప్రభుత్వం అధ్యయనం చేస్తుందే తప్ప... వాటికి పరిష్కార మార్గాలు చూపించడంలో మాత్రం అలసత్వం వహిస్తుందని రైతులు ఆరోపిస్తున్నారు. అధికారులు స్పందించి తమను ఆదుకోవాలంటూ వేడుకుంటున్నారు.
ఇవీ చూడండి: సాగర్కు భారీ వరద..18 గేట్లు ఎత్తివేత
