ఈఎస్​ఐ కుంభకోణంలో మరిన్ని అరెస్టులు?

రాష్ట్రంలో సంచలనం సృష్టిస్తున్న ఈఎస్​ఐ మందుల కొనుగోలు కుంభకోణంలో మరిన్ని అరెస్టులకు ఏసీబీ సిద్ధమవుతోంది. స్కాంలో దాదాపు సగం మంది సిబ్బందికి ప్రమేయం ఉందని భావిస్తున్నప్పటికీ ఇప్పటి వరకూ ఏడుగురు మాత్రమే అరెస్టయ్యారు. దర్యాప్తులో వెల్లడయ్యే అంశాల ఆధారంగా త్వరలోనే మరింత మంది కటకటాలపాలు కావొచ్చని తెలుస్తోంది. ఇప్పటి వరకు జరిగిన సోదాల్లో సేకరించిన పత్రాలను అనిశా విశ్లేషిస్తోంది. అక్రమాలకు పాల్పడ్డ అధికారులు సమకూర్చుకున్న ఆస్తులు వారి బినామీల జాబితా సిద్ధం చేయనున్నారు.

ఈఎస్​ఐ-ఐఎంఎస్ కుంభకోణంలో కీలక సూత్రధారుల చుట్టు అవినీతి నిరోధక శాఖ ఉచ్చు బిగించేలా కసరత్తు చేస్తోంది. ఆ విభాగం సంచాలకురాలు దేవికారాణి, సంయుక్త సంచాలకురాలు పద్మ సహా ఏడుగురు ఇప్పటికే అరెస్టయ్యారు. ఈ కుంభకోణంలో ఇంకా అనేక మందికి ప్రమేయం ఉన్నట్లు ఏసీబీ గుర్తించింది. 23 మంది ఇళ్లలో అనిశా అధికారులు సోదాలు నిర్వహించారు.

కీలక ఉన్నతాధికారి

ఈ వ్యవహారంలో ఓ కీలక ఉన్నతాధికారి, ఓ ప్రముఖ రాజకీయ నేత బంధువు పేర్లు వినిపిస్తుండడం చర్చనీయాంశంగా మారింది. లక్షల రూపాయల బిల్లులకు సంబంధించిన దస్త్రం కదలాలంటే క్షేత్ర స్థాయి నుంచి పై వరకు పలువురు సంతకాలు చేయాల్సి ఉంటుంది. ఈ విభాగంలో ఏకంగా సంచాలకురాలితో పాటు సంయుక్త సంచాలకురాలే అక్రమాలకు పాల్పడడం వల్ల కిందిస్థాయి అధికారులపై ఒత్తిళ్లు పెరిగాయి. డబ్బులకు ఆశపడి కొందరు... ఒత్తిళ్లకు లొంగిపోయి మరికొందరు ఈ అక్రమానికి సహకరించారు.

బినామీలపై కూడా...

దర్యాప్తులో ఏసీబీ 23 మందిని విచారించింది. వీరిలో ఏడుగురిని అరెస్టు చేసి మరికొందరిని సాక్ష్యులుగా పేర్కొంది. ఇండెంట్లు ఏమార్చిన ఫార్మాసిస్టులు, ఇతర సిబ్బందిపై అనిశా ప్రత్యేక దృష్టి సారించింది. అక్రమంగా కొల్లగొట్టిన డబ్బుతో ఎక్కడెక్కడ ఆస్తులు కూడబెట్టారని ఏసీబీ కూపీ లాగుతోంది. బినామీలుగా వ్యవహరించిన ప్రైవేట్‌ వ్యక్తుల గురించి కూడా ఆరా తీస్తున్నారు.ఇంకా ఈ కుంభకోణంలో అనిశా మరింత మందిని అరెస్టు చేసే అవకాశం ఉంది. ప్రస్తుత విచారణ ఆధారంగా అరెస్టులు ఉండనున్నాయి.

ఇదీ చూడండి : రాష్ట్ర వ్యాప్తంగా కన్నుల పండువగా బతుకమ్మ వేడుకలు