CEC Arrangements for Conducting Elections with IT Software Help : ఐటీ సాంకేతికతతో ఎన్నికల నిర్వహణ.. ఒక్కో పనికి ఒక్కో సాఫ్ట్​వేర్

CEC Arrangements for Conducting Elections with IT Software Help : ఐటీ సాఫ్ట్​వేర్​ల సహాయంతో రానున్న శాసనసభ ఎన్నికల ప్రక్రియను సాఫీగా నిర్వహించేందుకు కేంద్ర ఎన్నికల సంఘం ఏర్పాట్లు చేసింది. ఈసీతో పాటు రాష్ట్ర ప్రధాన ఎన్నికల అధికారి కార్యాలయం అధికారులు పలు ఐటీ సాఫ్ట్​వేర్లను వినియోగించనున్నారు. ఓటర్ల నుంచి ఫిర్యాదులు స్వీకరించడానికి, వీవీప్యాట్ యంత్రాల డేటాబేస్​ల నిర్వహణకు, ఎన్నికల పర్యవేక్షణకు ఇలా ఒక్కో పనికి ఒక్కో సాఫ్ట్​వేర్ ఉపయోగించనున్నారు. ఈ నేపథ్యంలో ఆయా యాప్​లు, సాఫ్ట్​వేర్​ల ప్రత్యేకతలు.

CEC Arrangements for Conducting Elections with IT Software Help : ఐటీ సాంకేతికతతో కూడిన పలు సాఫ్ట్​​వేర్​ల సహకారంతో తెలంగాణ ఎన్నికలను విజయవంతంగా నిర్వహించేందుకు కేంద్ర ఎన్నికల సంఘం ఏర్పాట్లు చేసింది. దీని వల్ల ఎన్నికలను మరింత పారదర్శకంగా, సమర్ధవంతంగా నిర్వహించేందుకు అవకాశం కలుగుతోంది. ఇప్పటికే తెలంగాణ రాష్ట్ర ఎలక్షన్ షెడ్యూల్ విడుదల చేసిన వేళ ఈ ఎన్నికలలో ఏఏ సాఫ్ట్​వేర్​లు వాడనున్నారు.. వాటి ప్రత్యేకత ఏంటో తెలుసుకుందాం..

National Grievance Services (NGS) Portal : ఓటర్ల జాబితా, ఎన్నికలకు సంబంధించి ప్రజల నుంచి ఫిర్యాదుల కోసం నేషనల్ గ్రీవియెన్సెస్ సర్వీసెస్(ఎన్జీఎస్) పోర్టల్ వినియోగించనున్నారు. అభ్యర్థులు, రాజకీయ పార్టీలు తీసుకోవాల్సిన అనుమతులు, అఫిడవిట్లు, పోలింగ్ శాతం నమోదు, పోటీ చేసే అభ్యర్థులకు వచ్చిన ఓట్లు, స్క్రూటినీ నివేదిక తదితరాల కోసం ఎన్​కోర్ వెబ్​సైట్​ను ఉపయోగించనున్నారు.

cVIGIL App : సీవిజిల్ యాప్ ద్వారా వచ్చే ఫిర్యాదుల పరిష్కారానికై సీవిజిల్ వెబ్​సైట్​ను వినియోగించనున్నారు. ఈ యాప్ ద్వారా ఎన్నికలకు సంబంధించిన ఫిర్యాదులను వివిధ వ్యక్తుల నుండి స్వీకరిస్తారు. ఎన్నికల నియమావళిని ఎవరైనా ఉల్లంఘించినట్లయితే అటువంటి వారిపై ఫిర్యాదులను ఈ యాప్ ద్వారా చేయవచ్చు.

ETPBS : సర్వీసు ఓటర్లు తమ ఓట్లను ఎలక్ట్రానిక్ విధానంలో వినియోగించుకునేలా ఈ-పోస్టల్ బ్యాలెట్ కోసం ఎలక్ట్రానికల్లీ ట్రాన్స్ మిటెడ్ పోస్టల్ బ్యాలెట్ సిస్టం(ఈటీపీబీఎస్) ను వినియోగిస్తారు. సర్వీస్ ఓటర్ల దరఖాస్తుల పరిశీలన వివరాల నమోదు, తదితరాల కోసం సర్వీస్ ఓటర్స్ పోర్టల్ ఉపయోగిస్తారు.

EMS 2.0 : ఈవీఎం, వీవీప్యాట్ యంత్రాల డేటాబేస్ నిర్వహణ, ఎఫ్ఎల్సీ, ఈవీఎంల మూవ్ మెంట్ నమోదు, రాండమైజేషన్, తదితరాల కోసం ఈవీఎం మేనేజ్మెంట్ సిస్టం - ఈఎంఎస్ 2.0ను ఉపయోగించనున్నారు. మొత్తంగా ఎలక్ట్రానిక్ ఓటింగ్ యంత్రాలకు సంబంధించినది ఈ ఈఎంఎస్ అని చెప్పవచ్చు.

పోలింగ్ రోజు ఆయా పోలింగ్ కేంద్రాల్లో వెబ్ కాస్టింగ్ ద్వారా ఈసీ, సీఈఓ, డీఈఓ, ఆర్వో స్థాయిలో పర్యవేక్షణ కోసం ప్రత్యేక పోర్టల్ వినియోగిస్తారు. దీంతో పాటు క్షేత్రస్థాయిలో సర్వైలెన్స్ బృందాల పర్యవేక్షణకు కూడా ఉపయోగిస్తారు.

Observer Portal Election Commission of India : ఎన్నికల ప్రక్రియలో భాగంగా సాధారణ, వ్యయ, పోలీసు, అవగాహన పరిశీలకుల కోసం ప్రత్యేకంగా అబ్జర్వర్ పోర్టల్ ను రూపొందించారు. పరిశీలకులు, కేంద్ర ఎన్నికల సంఘం మధ్య ఉత్తర, ప్రత్యుత్తరాల కోసం ఈ పోర్టల్ ను వినియోగిస్తారు.