విద్యార్థులకు గుడ్ న్యూస్... దోస్త్ ప్రత్యేక డ్రైవ్

డిగ్రీ సీట్లు అధిక సంఖ్యలో మిగిలిపోవడంతో ప్రత్యేక డ్రైవ్ నిర్వహించాలని దోస్త్ నిర్ణయించింది. దాదాపు 2లక్షల సీట్లు మిగిలిపోవడంతో మరో అవకాశం ఇచ్చినట్లు దోస్త్ కన్వీనర్ లింబాద్రి తెలిపారు. ఇప్పటివరకు డిగ్రీలో చేరని విద్యార్థులు మాత్రమే ఈ ప్రత్యేక విడతలో పాల్గొనాలని వెల్లడించారు.

రాష్ట్రంలో డిగ్రీ సీట్లు భారీగా మిగిలిపోవడంతో... వాటి భర్తీ కోసం దోస్త్ మరో అవకాశం ఇచ్చింది. ఈనెల 27 నుంచి ప్రత్యేక డ్రైవ్ నిర్వహించాలని నిర్ణయించింది. నాలుగు విడతల్లో జరిగిన కౌన్సిలింగ్‌లో సుమారు 2లక్షల సీట్లు భర్తీ కాగా.. మరో 2 లక్షల సీట్లు మిగిలాయి. ఈనెల 27 నుంచి డిసెంబరు 2 వరకు ప్రత్యేక డ్రైవ్ ఉంటుందని దోస్త్ కన్వీనర్ లింబాద్రి ప్రకటించారు.

ఇప్పటి వరకు డిగ్రీలో చేరని విద్యార్థులు ప్రత్యేక విడతలో పాల్గొనాలని ఆయన సూచించారు. డిసెంబరు 4న ప్రత్యేక డ్రైవ్ సీట్లను కేటాయించనున్నట్లు ఆయన వెల్లడించారు.

ఇదీ చదవండి: భారీ వర్షాలు.. ఉద్ధృతంగా ప్రవహిస్తున్న నదులు