High Command To solve T Congress Dispute : తెలంగాణ కాంగ్రెస్‌లో తలెత్తిన వివాదానికి తెరదించేందుకు... పార్టీ అధిష్ఠానం చర్యలు ముమ్మరం చేసింది. ట్రబుల్‌ షూటర్‌గా సీనియర్‌ నేత దిగ్విజయ్‌సింగ్‌ను రంగంలోకి దించింది. మంగళవారం మధ్యాహ్నం నుంచే దిగ్విజయ్‌... వ్యతిరేక, అనుకూల వర్గాలతో సంప్రదింపులు జరుపుతున్నారు. రాష్ట్ర ఇంఛార్జులుగా ఉన్న ఏఐసీసీ కార్యదర్శులు బోసురాజు, నదీం జావిద్‌, రోహిత్‌ చౌదరితో దిల్లీలో ప్రత్యేక సమావేశమయ్యారు.
తెలంగాణ కాంగ్రెస్‌లో తాజా పరిస్థితులపై ఆరా తీశారు. పీసీసీ కమిటీలు, సీనియర్ల అసంతృప్తికి గురించి అడిగి తెలుసుకున్నారు. పీసీసీ అధ్యక్షుడు, సీఎల్పీ గ్రూపుల మధ్య అభిప్రాయభేదాలపై తెలుసుకున్నట్లు సమాచారం. ఇవాళ రాత్రి 7 గంటల 45 నిమిషాలకు హైదరాబాద్ చేరుకుంటారు. మర్యాదపూర్వకంగా పలువురు కాంగ్రెస్ నేతల్ని కలిసే అవకాశం ఉంది. అలాగే ఏఐసీసీ ఇటీవల ప్రకటించిన కమిటీల జాబితా తనకు అందించాలని పీసీసీ కార్యనిర్వాహక అధ్యక్షుడు మహేశ్‌కుమార్‌గౌడ్‌ను ఆదేశించినట్లు తెలుస్తోంది.
అసంతృప్తితో ఉన్న సీనియర్లతో గాంధీభవన్‌ లేదా తాను బస చేసిన హోటల్‌లో దిగ్విజయ్‌సింగ్‌ సమావేశం అయ్యే అవకాశం ఉంది. పీసీసీ అధ్యక్షుడి తీరుపై దిగ్విజయ్‌ ఎదుట తమ అసంతృప్తిని వెళ్లగక్కేందుకు సీనియర్‌ నేతలు సిద్ధమవుతున్నారు. పీసీసీ కమిటీల్లో పార్టీ కోసం ఏళ్లుగా పనిచేస్తున్నవారికి పదవులు ఇవ్వలేదనే విషయాన్ని ఆయన దృష్టికి తీసుకెళ్లనున్నారు.
ఇవీ చదవండి: అధిష్ఠానం హామీ.. కాంగ్రెస్‌లో నెలకొన్న సంక్షోభానికి తాత్కాలిక తెర
మళ్లీ భయం పుట్టిస్తున్న కరోనా కేసులు.. అప్రమత్తమైన కేంద్రం.. రాష్ట్రాలకు కీలక సూచన
