గృహహింస కేసులో వ్యక్తిని చితకబాదిన పోలీసులు - విచారణకు ఆదేశించిన సీపీ!

Cyberabad Commissioner orders Investigation on KPHB Police : దంపతుల వివాదం కేసులో కేపీహెచ్​బీ పోలీసులు చేసిన ఓవరాక్షన్ ఇప్పుడు పోలీసు ఉన్నతాధికారులకు తలనొప్పిగా మారింది. చిన్న కేసులో కౌన్సిలింగ్ చేయాల్సింది పోయి ఓ వ్యక్తిని చితికబాదడం వివాదాస్పదమైంది. బాధితుడు ఉన్నతాధికారులను ఆశ్రయించడంతో సైబరాబాద్ పోలీస్ కమిషనర్ అవినాష్‌ మహంతి కేపీహెచ్‌బీ పోలీసులపై విచారణకు ఆదేశించినట్లు తెలుస్తోంది.

Cyberabad Commissioner orders Investigation on KPHB Police : కేసు విచారణ పేరుతో పిలిచి ఓ వ్యక్తిని కేపీహెచ్​బీ పోలీసులు చితకబాదిన ఘటన ఆలస్యంగా వెలుగులోకి వచ్చింది. ఆ బాధితుడి ఫిర్యాదు మేరకు ఘటనపై విచారణ చేపట్టాలని సైబరాబాద్ పోలీస్ కమిషనర్ ఆదేశించారు. బాధితుడు తెలిపిన వివరాల ప్రకారం గుంటూరు జిల్లాకు చెందిన మొవ్వా ప్రణీత్​కు అదే జిల్లాకు చెందిన శ్రీలక్ష్మితో 2018లో వివాహం జరిగింది. భార్యాభర్తల మధ్య వివాదం రావటంతో శ్రీలక్ష్మి, ప్రణీత్​పై గుంటూరులోని దిశ పోలీస్ స్టేషన్​లో(Disha Police Station) కేసు పెట్టి, అతడికి దూరంగా ఉంటోంది.

Man Complaint on KPHB Police in Cyberabad Station : ప్రణీత్ హైదరాబాద్​లో ఓ బ్యాంకులో మేనేజర్​గా పనిచేస్తున్నాడు. కొద్దిరోజుల క్రితం శ్రీలక్ష్మి తన భర్త వేధింపులపై ఫిర్యాదు చేస్తూ తన సర్టిఫికెట్లు తన భర్త వద్దే ఉన్నాయని, తనకి న్యాయం చేయాలంటూ గుంటూరు నల్లపాడు పోలీస్ స్టేషన్​లో(Nallapadu Police Station)ఫిర్యాదు చేసింది. కేసు విచారణలో ఉండగా మళ్లీ కేసు నమోదు చేయమని అక్కడి పోలీసులు ఫిర్యాదు తీసుకునేందుకు నిరాకరించారు. దీంతో శ్రీలక్ష్మి, తన భర్త నిజాంపేట రోడ్డులో నివసిస్తూ ఉండటంతో కేపీహెచ్​బీ పోలీసులకు ఫిర్యాదు చేసింది.

Couples Complaint Case in KPHB Police Station : విచారణ నిమిత్తం స్టేషన్​కు పిలిపించిన కేపీహెచ్​బీ పోలీసులకు, తనపై అప్పటికే కేసు నమోదై విచారణలో ఉన్నట్లు ప్రణీత్ తెలిపాడు. అయినా శ్రీలక్ష్మి సర్టిఫికెట్స్ ఇవ్వాలంటూ పోలీసులు అతడిని దూషిస్తూ, విచక్షణారహితంగా చితకబాదారని, దీంతో తనకు తీవ్రగాయాలయ్యాయని బాధితుడు తెలిపాడు. తనపై అకారణంగా దాడికి పాల్పడిన సీఐ, ఎస్సై, కానిస్టేబుళ్లపై చర్యలు తీసుకోవాలంటూ ప్రణీత్ సామాజిక మాధ్యమం(Social Media) ద్వారా సైబరాబాద్ పోలీస్ కమిషనర్​ అవినాష్‌ మహంతికి ఫిర్యాదు చేశాడు.

'నాకు 2018లో శ్రీలక్ష్మీతో వివాహం జరిగింది. కొన్నేళ్ల క్రితం మా ఇద్దరి మధ్య వివాదాలు అయ్యి విడిపోయాం. అప్పుడే నాపై తను గుంటూరులో దిశ పోలీస్​ స్టేషన్​లో కేసు పెట్టింది. వేర్వేరు పోలీస్​ స్టేషన్​లో కూడా నాపై కేసు నమోదు చేయడానికి ప్రయత్నించింది. ఇప్పుడు కేపీహెచ్​బీ పోలీస్​ స్టేషన్​లో తన సర్టిఫికెట్లు నా దగ్గరే ఉన్నాయంటూ ఫిర్యాదు చేసింది. దీంతో కేపీహెచ్​బీ పోలీసులు నన్ను స్టేష్​న్​కు పిలిపించారు. గత కేసులకు సంబంధించిన ఫైళ్లను పోలీసులకు ఇచ్చాను. అయినప్పటికీ సీఐ క్యాబిన్​లో నన్ను, నలుగురు పోలీసులు కలిసి కొట్టారు.' - ప్రణీత్​ , బాధితుడు

ప్రణీత్ విజ్ఞప్తిని పరిశీలించిన కమిషనర్ కేపీహెచ్​బీ పోలీసులపై అంతర్గత విచారణకు ఆదేశించినట్లు సమాచారం. అయితే దీనిపై పోలీస్ ఉన్నతాధికారులు స్పందించ లేదు.