లాక్​డౌన్ ఉల్లంఘనులపై లాఠీలు ఝుళిపిస్తున్న పోలీసులు

రాష్ట్రంలో లాక్​డౌన్​ కఠినంగా అమలవుతోంది. సీఎం ఆదేశాల మేరకు ఉదయం 10.10 తర్వాత అనుమతులు లేకుండా రోడ్లపై తిరుగుతున్న వాహనదారులపై పోలీసులు లాఠీలు ఝుళిపిస్తున్నారు. పలు వాహనాలను సీజ్​ చేసి, కేసులు నమోదు చేస్తున్నారు. అనవసరంగా బయట తిరిగితే చర్యలు తప్పవని హెచ్చరిస్తున్నారు.

కరోనా కట్టడికి పోలీసులు లాక్​డౌన్​ను కఠినంగా అమలు చేస్తున్నారు. కూకట్​పల్లిలోని పలు ప్రాంతాల్లో వాహన తనిఖీలను ముమ్మరం చేశారు. 10.10 దాటాక అనవసరంగా రోడ్లపైకి వచ్చిన వారిపై లాఠీలు ఝుళిపించారు. ఈ తనిఖీలను సైబరాబాద్​ సీపీ సజ్జనార్ ఆకస్మికంగా​ పరిశీలించారు. ఈ-పాస్​లు లేకుండా రోడ్లపైకి వచ్చిన వాహనాలను సీజ్ చేయాలని సిబ్బందికి సూచించారు.

లాక్​డౌన్​ తీరును పరిశీలిస్తున్న సీపీ

ఈ సందర్భంగా లాక్​డౌన్ సమయంలో ప్రజలు బయటకు రాకుండా కఠిన చర్యలు తీసుకుంటున్నామని సీపీ పేర్కొన్నారు. లింక్​రోడ్​లలో సైతం తనిఖీలు నిర్వహిస్తున్నామని తెలిపారు. ఆదివారం కావడంతో ఉదయం పూట మార్కెట్​లలో పోలీసులను ఏర్పాటు చేసి.. ప్రజలు భౌతిక దూరం పాటించేలా చర్యలు తీసుకున్నామన్నారు. ప్రజలు అనుమతులు లేకుండా రోడ్లపైకి వస్తే చర్యలు తప్పవని హెచ్చరించారు.