గ్రేటర్ హైదరాబాద్లో కొన్ని ప్రాంతాల్లో ఎక్కువగా కేసులు నమోదు అవుతున్నాయి. ఎక్కువగా ఎనిమిది సర్కిళ్ల నుంచి వస్తున్నట్లు లెక్కలు చెబుతున్నాయి. ప్రధానంగా ఖైరతాబాద్ జోన్ పరిధిలో ఐదు సర్కిళ్లతో పాటు, కూకట్ పల్లి , శేరిలింగపల్లి, సికింద్రాబాద్ జోన్ల పరిధిలో ఒక్కో సర్కిల్ను హైరిస్క్ ప్రాంతాలుగా ప్రకటించారు. అయితే ఈ ఎనిమిది సర్కిళ్లలో కరోనా కట్టడికి చర్యలు తీసుకోవాలని నిర్ణయించిన జీహెచ్ఎంసీ... అక్కడ ప్ర‌త్యేకాధికారుల‌ను ఏర్పాటు చేసింది. కేసులు ఎక్కువగా నమోదైన సర్కిళ్లలో అడిషనల్ కమిషనర్లకు జీహెచ్ఎంసీ కమిషనర్ లోకేష్కుమార్ బాధ్యతలు అప్పగించారు.
సర్కిళ్లవారీగా అడిషనల్ కమిషనర్లకు బాధ్యతలు
శేరిలింగంపల్లి జోన్లోని యూసుఫ్గూడకు అడిషనల్ కమిషనర్ యాదగిరికి, సికింద్రాబాద్ జోన్లోని అంబర్పేట్కు అడిషనల్ కమిషనర్ కెన్నెడీ, ఖైరతాబాద్ జోన్లోని మెహదీపట్నంకు అడిషనల్ కమిషనర్ శంకరయ్య, కార్వాన్కు జేసీ సంధ్య, చార్మినార్ జోన్లోని చాంద్రాయణగుట్టకు అడిషనల్ కమిషనర్ విజయలక్ష్మికి, చార్మినార్ జోన్ లోని చార్మినార్కు అడిషనల్ కమిషనర్ రాహుల్ రాజ్కి, చార్మినార్ జోన్లోని రాజేంద్ర నగర్కు అడిషనల్ కమిషనర్ సంతోష్కు, కూకట్పల్లి జోన్లోని కుత్బుల్లాపూర్కు ఇన్ఛార్జిగా ప్రియాంక అలకు బాధ్యతలు ఇచ్చారు. వీరు ప్రతిరోజు అక్కడి ప్రాంతాల్లో పర్యటించి క్షేత్రస్థాయిలో తీసుకోవాల్సిన చర్యలను సమీక్షించి అమలు చేయాలి. కానీ ఇంతవరకు బాగానే ఉన్నా అక్కడి కట్టడి చర్యలు సమగ్రంగా జరగడం లేదన్న విమర్శలొస్తున్నాయి.
ఇప్పటికైనా పట్టించుకోవాలి..
హైరిస్క్ సర్కిళ్ల పరిధిలో కంటైన్మెంట్ జోన్ల నిర్వహణ పూర్తిస్థాయిలో జరగడం లేదని... అక్కడ పాజిటివ్ వచ్చిన వారికి ఐసోలేష‌న్ కిట్లు అందించడంలో కూడా విఫలం అవుతున్నారని పలువురు విమర్శిస్తున్నారు. పాజిటివ్ వచ్చిన మూడు, నాలుగు రోజుల వరకు కిట్లు అందించ‌డం లేదని బాధితులు వాపోతున్నారు. ఇక యాక్టివ్ కేసులు వందల సంఖ్యలో ఉన్నప్పటికీ కంటైన్మెంట్ జోన్లు మాత్రం పెట్ట‌డం లేదు. ఫలితంగా ప్ర‌త్యేక అధికారులను కేటాయించి దాదాపు 15 రోజులు అవుతున్నా... కేసుల సంఖ్యలో మార్పురాలేదు. పలు సర్కిళ్లలో 8 వందల నుంచి 12 వందల వరకు యాక్టివ్ కేసులు ఉన్నాయి.
ఇదే కాదు ప్రైవేటు ఆసుపత్రుల్లో టెస్టులు చేయించుకుని పాజిటివ్ నిర్దార‌ణ అయిన వారి వివరాలు కూడా వీరు త్వరగా తెప్పించుకోవడం లేదు. జీహెచ్ఎంసీ నుంచి ఎలాంటి ఫోన్ కాల్ రాకపోవడం వల్ల మూడు నాలుగు రోజుల తర్వాత రోగులు లేదా వారి చుట్టు పక్కల వారు బల్దియా కంట్రోల్ రూమ్ లేదా అధికారులకు కాల్ చేసి తమ ప్రాంతంలో పాజిటివ్ వచ్చిందని... అక్కడ అవసరమైన చర్యలు తీసుకోవాలని కోరుతున్నారు. అయినా అధికారుల దగ్గర నుంచి పూర్తి స్థాయి సహకారం అందడం లేదు. ఇదే వైరస్ మ‌రింత వ్యాప్తికి కార‌ణం అవుతోంద‌ని న‌గ‌ర ప్ర‌జ‌లు ఆందోళ‌న వ్య‌క్తం చేస్తున్నారు. ఇప్పటికైనా బల్దియా అధికారులు ప‌ట్టించుకోవాల‌ని కోరుతున్నారు.
ఇవీ చూడండి: అంబులెన్స్ సిబ్బంది నిర్లక్ష్యం.. రోడ్డుపైనే వాడిన పీపీఈ కిట్ల పడవేత
