Congress MLA Ticket Application Last Date : ఎన్నికల ప్రచారంలో కాంగ్రెస్ జోరు పెంచింది. ముదిరాజ్‌లకు ఒక్కసీటు బీఆర్‌ఎస్‌ కేటాయించలేదని పీసీసీ అధ్యక్షుడు రేవంత్‌ రెడ్డి(TPCC Chief Revanth Reddy) తప్పుబట్టారు. వికారాబాద్ జిల్లా పూడూరు మండలం మన్నెగూడలో ఏర్పాటు చేసిన పరిగి నియోజకవర్గ సన్నాహక సమావేశానికి రేవంత్‌రెడ్డి హాజరయ్యారు. ఈనెల 26న చేవెళ్ల లో నిర్వహించనున్న దళిత గిరిజన డిక్లరేషన్ ప్రజా గర్జన భారీ బహిరంగ సభను విజయవంతం చేయాలని శ్రేణులకు పిలుపునిచ్చారు. మాదిగ బిడ్డలకు మంత్రి పదవులు ఎందుకు ఇవ్వలేదంటూ.. ముఖ్యమంత్రి కేసీఆర్‌ను రేవంత్‌రెడ్డి ప్రశ్నించారు.
Congress MLA Ticket Application Telangana : అసెంబ్లీ నియోజకవర్గాల వారీగా అభ్యర్ధుల బలాబలాలపై నివేదికలు ఇవ్వాలని పార్లమెంట్‌ నియోజక వర్గాల పరిశీలకులను... ముఖ్య పరిశీలకులు ఆదేశించారు. ఇందిరా భవన్‌లో రాష్ట్ర వ్యవహారాల ఇంఛార్జి మానిక్‌రావుఠాక్రే.. ముఖ్య పరిశీలకులు దీపాదాస్‌ మున్సీ, మీనాక్షి నటరాజన్‌లు, ఏఐసీసీ ఇంఛార్జీ కార్యదర్శులు.. పరిశీలకులతో సమావేశమయ్యారు. ఇప్పటికే కొందరు క్షేత్రస్థాయికి వెళ్లగా చాలామంది పరిశీలకులు క్షేత్రస్థాయికి వెళ్లలేదు. తక్షణమే పరిశీలకులు అంతా నియోజక వర్గాలకు వెళ్లి రెండు, మూడు రోజులు అక్కడే మకాం వేసి.. అభ్యర్థులుగా ఎవరైతే అధికార పార్టీపై విజయం సాధించేందుకు అవకాశం ఉంటుందో నివేదికలు ఇవ్వాలని ఆదేశించినట్లు తెలుస్తోంది.
Telangana Assembly Elections 2023 : కాంగ్రెస్ నుంచి టికెట్ ఆశిస్తున్న ఆశావహుల నుంచి దరఖాస్తులు వెల్లువెత్తుతున్నాయి. నిన్నటివరకు సుమారు 700 దరఖాస్తులు రాగా నేడు చివర రోజు అయినందున పెద్ద సంఖ్యలో వచ్చే అవకాశం ఉందని గాంధీభవన్‌ వర్గాలు అంచనావేస్తున్నాయి. సీఎల్పీ నేత భట్టి విక్రమార్కతోపాటు జగ్గారెడ్డి, శ్రీధర్‌బాబు, సీతక్క తదితరులు దరఖాస్తులు నేడు సమర్పించనున్నారు. పీసీసీ అధ్యక్షుడు రేవంత్‌రెడ్డి, పీసీసీ మాజీ అధ్యక్షుడు పొన్నాల లక్ష్మయ్య, మాజీ మంత్రి షబ్బీర్‌ అలీ, అంజన్‌కుమార్‌ యాదవ్‌, జగదీష్‌, ఖైలాస్‌, జానారెడ్డి కుమారుడు జైవీర్‌ రెడ్డి.. మల్‌రెడ్డి రామిరెడ్డి సహా పలువురు అర్జీలు సమర్పించారు. రేవంత్‌రెడ్డి తరఫున కొడంగల్ నేతలు పెద్ద సంఖ్యలో గాంధీభవన్‌ వచ్చి అర్జీ అందించారు. జనగాం నుంచి పొన్నాలకి మద్దతుగా అనుచరులు గాంధీభవన్‌ తరలి వచ్చారు.
"మీరు ముఖ్యమంత్రి అవుతారు, మీ అల్లుడు, కొడుకు మంత్రులు అవుతారు. మీ కూతురు ఎంపీగా ఓడిపోతే ఎమ్మెల్సీ ఇస్తావు. ఇంత మందికి ఇన్ని ఇచ్చావు మరీ ముదిరాజ్‌లకు, మాదిగలకు మంత్రి పదవి ఎందుకు ఇవ్వలేదని నేను ప్రశ్నిస్తున్నాను. మా పార్టీలోకి వస్తా అన్న నేతలకు మంత్రి పదవి ఇస్తున్నారు. ఈ ముదిరాజ్‌ బిడ్డలు తెలంగాణ ప్రజలు కారా..? ఈ ముదిరాజ్‌ బిడ్డలు తెలంగాణ ఉద్యమంలో పాల్గొనలేదా..? 117 టికెట్లు ఇస్తే అందులో ఒక్కటి కూడా ముదిరాజ్‌ బిడ్డకు ఇవ్వలేదు." - రేవంత్‌రెడ్డి, పీసీసీ అధ్యక్షుడు
కరీంనగర్‌ మైత్రీ గ్రూప్‌ ఛైర్మన్‌ కొత్త జయపాల్‌ రెడ్డి.. కాంగ్రెస్లో చేరారు. ఆయన్ని పీసీసీ అధ్యక్షుడు రేవంత్‌రెడ్డి కండువా కప్పి పార్టీలోకి ఆహ్వానించారు. ఉమ్మడి కరీంనగర్‌ జిల్లావ్యాప్తంగా ఉన్న జయపాల్‌ రెడ్డి అనుచరులు, అభిమానులు, పెద్ద సంఖ్యలో గాంధీభవన్‌కి వచ్చారు. త్వరలో కరీంనగర్‌లో భారీ బహిరంగ సభ ఏర్పాటుపై చర్చించారు. బీజేపీ, బీఆర్‌ఎస్‌తోడు దొంగలని.. రాష్ట్రంలో, కేంద్రంలో అవినీతి, అరాచక పాలనకు ముగింపు పలకాలంటే ప్రత్యామ్నాయం కాంగ్రెస్ మాత్రమేనని.. ఏఐసీసీ కార్యదర్శి సంపత్ కుమార్ పిలుపునిచ్చారు. మహబూబ్‌నగర్‌లో ప్రముఖ న్యాయవాది, ప్రస్తుత బీజేపీ నేత ఎన్‌పీ వెంకటేష్ ఇంటికి వెళ్లి ఆయనను కాంగ్రెస్‌లోకి రావాల్సిందిగా ఆహ్వానించారు.
Congress MLA Candidates Hyderabad : బలమైన నేతల కోసం కాంగ్రెస్ వేట.. GHMC గెలుపు గుర్రాలెక్కడ..?
