భారత్, చైనా సరిహద్దులో గల్వాన్ లోయలో అమరులైన కర్నల్‌ సంతోష్‌బాబుతో సహా 20మంది భారత సైనికులకు ఘనంగా నివాళులు అర్పించడం, వరుసగా పెరుగుతున్న పెట్రోల్ ధరలపై నిరసన కార్యక్రమాలను దేశవ్యాప్తంగా నిర్వహించాలని కాంగ్రెస్ అధిష్ఠానం నిర్ణయించింది. ఈ మేరకు రాష్ట్రాల పీసీసీలకు ఏఐసీసీ ప్రధాన కార్యదర్శి కేసీ వేణుగోపాల్ లేఖ రాశారు. గల్వాన్ లోయలో అమరులైన భారత సైనికులకు ఈనెల 26న ఘనంగా నివాళులు అర్పించాలని, ఆరోజు ఉదయం 11 నుంచి మధ్యాహ్నం 12 గంటల వరకు "ఆమ్ దివాస్‌''ను పాటించి వారికి సంఘీభావం ప్రకటించాలని పార్టీ నాయకులకు తెలియజేశారు.
త్యాగాలను గుర్తిస్తూ...
'షాహీద్ స్మారక్' మహాత్మా గాంధీ ఇతర స్వాతంత్య్ర సమరయోధుల విగ్రహాల వద్ద కూర్చోవాలని, కొవ్వొత్తులు వెలిగించి అమరులైన జవాన్లను స్మరించే ప్లకార్డులు, జాతీయ జెండాలను ప్రదర్శించాలని కేసీ వేణుగోపాల్ తెలిపారు. గంటపాటు ఎలాంటి నినాదాలు చేయకుండా సామాజిక దూరాన్ని పాటించి నిశ్శబ్దంగా ఉండాలని సూచించారు. జవాన్ల త్యాగాన్ని గుర్తుచేస్తూ... సరిహద్దు రక్షించడంలో కేంద్రం వైఫల్యాలను ఎత్తి చూపాలని విజ్ఞప్తి చేశారు.
29న దేశవ్యాప్తంగా...
ఈ కార్యక్రమంలో కాంగ్రెస్ జిల్లా కమిటీ, బ్లాక్ కమిటీ, అసెంబ్లీ కమిటీలు తదితర పార్టీ నాయకులు, శ్రేణులు పాల్గొనేట్లు పీసీసీలు దిశానిర్దేశం చేయాలన్నారు. ఈ కార్యక్రమానికి సంబంధించి వీడియోలను సామాజిక మాధ్యమాల్లో పోస్ట్‌ చేయాలని సూచించారు. పెట్రోల్, డీజిల్ ధరల పెరుగుదలను నిరసిస్తూ... ఈనెల 29న దేశ వ్యాప్తంగా ధర్నాలు నిర్వహించాలని పార్టీ నిర్ణయించినట్లు పీసీసీలకు రాసిన లేఖలో పేర్కొన్నారు. ప్రతి జిల్లా ప్రధాన కార్యాలయంలో ఉదయం 10 నుంచి మధ్యాహ్నం 12 గంటల వరకు రెండు గంటలపాటు ధర్నా నిర్వహించాలని పేర్కొన్నారు.
అందరినీ భాగస్వామ్యం చేయాలి..
ఎంపీలు, ఎమ్మెల్యేలు జిల్లా మేజిస్ట్రేట్ ద్వారా ధరల పెరుగుదలకు వ్యతిరేకంగా రాష్ట్రపతికి లేఖలు రాసి మీడియాకు విడుదల చేయాలన్నారు. పెట్రోలియం ఉత్పత్తుల ధరలు పెరుగుదలతో ఇబ్బందులు ఎదుర్కొంటున్న సామాన్య జనంతోపాటు ఓలా, ఉబర్, టాక్సీ, ట్రక్ డ్రైవర్లను భాగస్వామ్యం చేసి ఈనెల 30 నుంచి జూలై 4 వరకు ధర్నాలు నిర్వహింపజేయాలని పీసీసీలను ఆదేశించారు.
ఇవీ చూడండి: ప్రజాప్రతినిధులే కథానాయకులు.. ప్రజలే కాపలాదారులు: కేసీఆర్
