రాష్ట్రంలోని ప్రతి ఒక్కరికీ మిషన్ భగీరథ ద్వారా సురక్షితమైన తాగునీరు అందినప్పుడే ప్రాజెక్ట్ లక్ష్యం నెరవేరినట్లవుతుందని సీఎంవో కార్యదర్శి స్మితాసబర్వాల్ అన్నారు. మిషన్ భగీరథ చీఫ్ ఇంజినీర్లు, అన్ని జిల్లాల ఎస్ఈలతో హైదరాబాద్ ఎర్రమంజిల్లో సమీక్ష నిర్వహించారు. నియోజకవర్గాల వారీగా నీటి సరఫరా తీరును సమీక్షించారు. గ్రామాల్లో జరుగుతున్న స్థిరీకరణ పనుల పురోగతిని తెలుసుకొని సంతృప్తి వ్యక్తం చేశారు. డిసెంబర్ చివరి నాటికి రాష్ట్రంలోని అన్ని గ్రామాలకు నీటి సరఫరా చేయాలని ఇంజినీర్లను ఆదేశించారు. ఇప్పటికే ఆదిలాబాద్ నుంచి అమ్రాబాద్ వరకు ఉన్న ఆదివాసీ గూడాలు, లంబాడా తండాలకు మిషన్ భగీరథతో రక్షిత మంచినీరు అందుతోందని అన్నారు.
రైతువేదికలు, వైకుంఠధామాలకు కూడా మిషన్ భగీరథ నల్లా కనెక్షన్ ఇవ్వాలని సూచించారు. సమావేశంలో మిషన్ భగీరథ వాటర్ బాటిల్లను వినియోగించిన అధికారులను స్మితా సబర్వాల్ అభినందించారు. ఇక నుంచి మిషన్ భగీరథ కార్యక్రమాలు, సమావేశాల్లో కచ్చితంగా భగీరథ బాటిల్ నీటినే వాడాలని స్పష్టం చేశారు.
ఇదీ చూడండి: వంటనూనెల ధరలపై కరోనా ప్రభావం.. సామాన్యుడికి చుక్కలు
