పాతబస్తీలో ఆలయాల భూముల పరిరక్షణపై ముఖ్యమంత్రి స్పందించాలని భాజపా రాష్ట్ర అధ్యక్షుడు బండి సంజయ్ డిమాండ్ చేశారు. దేవాలయ భూములు కాపాడాలని కోరిన తమ కార్యకర్తలను అరెస్ట్ చేశారని.. వారిని కలవడానికి వెళితే డీసీపీ అడ్డుకున్నారని బండి అన్నారు. సాక్షాత్తు డీసీపీ కబ్జాదారులకు కొమ్ముకాశారని సంజయ్ ఆరోపించారు. ఈ ఘటనపై సీఎం, డీజీపీ స్పందించాలని డిమాండ్ చేశారు. ఆ కబ్జా భూములను స్వాధీనం చేసుకుని దేవాదాయ శాఖకు అప్పగించాలన్నారు. పోస్టింగ్, అవార్డు, రివార్డుల కోసం భాజపా కార్యకర్తలను నిలువరిస్తున్నారని ఆగ్రహం వ్యక్తం చేశారు. డీసీపీని వెంటనే సస్పెండ్ చేయాలని డిమాండ్ చేశారు.
ఇవాళ తమ ఓపిక వల్లే పాతబస్తీ ప్రశాంతంగా ఉందని.. 24 గంటల్లో పాతబస్తీలోని దేవాలయ భూముల పరిరక్షణపై ముఖ్యమంత్రి స్పందించని పక్షంలో భాజపా చేసే ఉద్యమానికి.. బాధ్యత వహించాల్సి ఉంటుందని బండి సంజయ్ స్పష్టం చేశారు.
ఇదేనా ఫ్రెండ్లీ పోలీసింగ్..
పాతబస్తీలో కాళీమాత ఆలయ స్థలాన్ని కబ్జా చేసేందుకు మజ్లిస్‌ యత్నిస్తోందని గోషామహల్ ఎమ్మెల్యే రాజాసింగ్ ఆరోపించారు. మూడుసార్లు ఆక్రమించేందుకు యత్నిస్తే భాజపా కార్యకర్తలు అడ్డుకున్నారని తెలిపారు. పాతబస్తీలోని నాలాలు, చెరువులు కబ్జా అయ్యాయన్నారు. దేవాలయ స్థలాలు కాపాడేందుకు వెళ్లిన తమ పార్టీ కార్యకర్తలను, మహిళలను పోలీసులు కొట్టారని.. ఇదేనా ఫ్రెండ్లీ పోలీసింగ్ అని ప్రశ్నించారు. ఆలయాల భూములు అన్యాక్రాంతమైతే సహించేది లేదని.. ఒక్క ఇంచు కబ్జా చేసినా చూస్తూ ఊరుకోబోమని హెచ్చరించారు.
ఇవీచూడండి: డబిర్‌పురలో ఉద్రిక్తత... ఎంఐఎం, భాజపా కార్యకర్తల మధ్య వాగ్వాదం
