ఆసక్తి ఉన్న ఒప్పంద అధ్యాపకులకు అవకాశం ఇవ్వండి: కేసీఆర్

జూనియర్ కళాశాలల ఒప్పంద అధ్యాపకుల సమస్యలపై మంత్రులు సబిత, పువ్వాడ అజయ్, ఉన్నతాధికారులతో సీఎం కేసీఆర్ సమీక్ష నిర్వహించారు. తమకు అనువైన మరో కళాశాలలో పనిచేసేందుకు అవకాశం కల్పించాలన్న ఒప్పంద అధ్యాపకుల విజ్ఞప్తులను పరిగణలోకి తీసుకుంటామని సీఎం తెలిపారు. నిబంధనలను అన్ని కోణాల్లో పరిశీలించి అవసరమైన విధివిధానాలు రూపొందించాలని ఆదేశించారు.

భర్తీకి అవకాశమున్న ఇతర ప్రభుత్వ జూనియర్ కళాశాలల్లో పనిచేసేందుకు ఆసక్తి, అర్హత ఉన్న ఒప్పంద అధ్యాపకులకు అవకాశం కల్పించాలని ముఖ్యమంత్రి కేసీఆర్ నిర్ణయించారు. విధివిధానాలు రూపొందించాలని అధికారులను ఆదేశించారు. జూనియర్ కళాశాలల ఒప్పంద అధ్యాపకుల సమస్యలపై మంత్రులు సబిత, పువ్వాడ అజయ్, ఉన్నతాధికారులతో సీఎం సమీక్ష నిర్వహించారు.

అధ్యాపకుల సమస్యలను మంత్రి సబిత, రైతుబంధు సమితి రాష్ట్ర అధ్యక్షుడు పల్లా రాజేశ్వర్ రెడ్డి ముఖ్యమంత్రికి వివరించారు. ఒప్పంద అధ్యాపకుల విషయంలో ప్రభుత్వం ఇప్పటికే పలు చర్యలు తీసుకున్నదన్న సీఎం... వారిని క్రమబద్ధీకరించాలన్న ప్రయత్నం న్యాయస్థానంలో కేసుల వల్ల నిలిచిపోయిందని చెప్పారు. వారి వేతనాలను రెట్టింపు చేశామని, గతంలో లాగా పదినెలలకు కాకుండా ఏడాది కాలానికి జీతాలు ఇస్తున్నామని తెలిపారు.

ఒప్పంద అధ్యాపకులకు సర్వీస్ బెనిఫిట్స్‌తో పాటు సెలవుల సదుపాయాలను కల్పించామన్న ముఖ్యమంత్రి... నిబంధనలు అనుమతుల ప్రకారం వారి సంక్షేమం కోసం ప్రభుత్వం చర్యలు తీసుకుంటుందని చెప్పారు. తమకు అనువైన మరో ప్రభుత్వ జూనియర్ కళాశాలలో పనిచేసేందుకు అవకాశం కల్పించాలన్న ఒప్పంద అధ్యాపకుల విజ్ఞప్తులను పరిగణలోకి తీసుకుంటామని సీఎం తెలిపారు. నిబంధనలను అన్ని కోణాల్లో పరిశీలించి అవసరమైన విధివిధానాలు రూపొందించాలని విద్యాశాఖ ఉన్నతాధికారులను ముఖ్యమంత్రి ఆదేశించారు.

ఇదీ చదవండి: 23 నుంచి వ్యవసాయేతర భూముల రిజిస్ట్రేషన్