కేంద్రాన్ని నిలదీయడానికి వెనకాడం: సీఎం కేసీఆర్​

కేంద్రంలోని భాజపా ప్రభుత్వం తెలంగాణకు నయా పైసా సాయం చేయలేదని రాష్ట్ర ముఖ్యమంత్రి కె.చంద్రశేఖర్ రావు ధ్వజమెత్తారు. ఆ పార్టీ అబద్దాలు చెబుతోందని.. విపక్ష పార్టీల ప్రభుత్వాలను కూలగొట్టడం మినహా ఏమి చేయడం లేదని విమర్శించారు. ఎమ్మెల్సీ పట్టభద్రుల ఎన్నికలు జరగనున్న హైదరాబాద్, రంగారెడ్డి, మహబూబ్​నగర్, నల్గొండ, వరంగల్, ఖమ్మం ఉమ్మడి జిల్లాలకు చెందిన మంత్రులు, ఎమ్మెల్యేలు, ఎమ్మెల్సీలు, ఎంపీలతో ప్రగతిభవన్​లో కేసీఆర్ సమావేశం నిర్వహించారు. దుబ్బాక, జీహెచ్ఎంసీ ఎన్నికల్లోనూ సర్వేలన్నీ తమవైపే ఉన్నాయన్నారు.

కేంద్ర ప్రభుత్వం దుర్మార్గంగా వ్యవహరిస్తోందని సీఎం కేసీఆర్ వ్యాఖ్యానించారు. తెలంగాణకు నయా పైసా సాయం చేయలేదని ధ్వజమెత్తారు. ఆ పార్టీ అబద్దాలు చెబుతోందని.. విపక్ష పార్టీల ప్రభుత్వాలను కూలగొట్టడం మినహా ఏమి చేయడం లేదని విమర్శించారు. తమకు రాష్ట్ర ప్రయోజనాలే ముఖ్యమని కేంద్ర ప్రభుత్వ వివక్షను ఎదుర్కొనడానికి వెనుకాడేది లేదని స్పష్టం చేశారు. వ్యవసాయ, విద్యుత్ బిల్లులు ప్రజా వ్యతిరేకంగా ఉన్నందునే వాటిని వ్యతిరేకరించామని చెప్పారు. దురదృష్టవశాత్తు కాంగ్రెస్ సమర్థంగా లేదని కేసీఆర్ పేర్కొన్నారు. నదీ జలాల కేటాయింపు, వినియోగం విషయంలో ఏపీ ప్రభుత్వం అతిగా వ్యవహరిస్తోందని.. కేంద్రం కూడా సరిగా లేదని సీఎం అన్నారు. ఎమ్మెల్సీ పట్టభద్రుల ఎన్నికలు జరగనున్న హైదరాబాద్, రంగారెడ్డి, మహబూబ్​నగర్, నల్గొండ, వరంగల్, ఖమ్మం ఉమ్మడి జిల్లాలకు చెందిన మంత్రులు, ఎమ్మెల్యేలు, ఎమ్మెల్సీలు, ఎంపీలతో ప్రగతిభవన్​లో కేసీఆర్ సమావేశం నిర్వహించారు.

ఎన్నిక ఏదైనా

రాష్ట్రంలో ఎన్నిక ఏదైనా గెలుపు తెరాసదే కావాలన్నారు. అందరం కలిసి తెరాస కుటుంబంగా విజయాన్ని సాధించాలన్నారు. రానున్న శాసనమండలి, దుబ్బాక, జీహెచ్ఎంసీ ఎన్నికలపై అన్ని సర్వేలు తమకే అనుకూలంగా ఉన్నాయని చెప్పారు. యువకులు, నిరుద్యోగులు తెరాసకు వ్యతిరేకమనే ప్రచారాన్ని తిప్పి కొట్టాలని పార్టీ ప్రజా ప్రతినిధులకు కేసీఆర్ పిలుపునిచ్చారు. ఉద్యమకాలం నుంచి యువత తెరాస వైపే ఉందని సీఎం పేర్కొన్నారు. ప్రజాప్రతినిధులు నిరంతరం ప్రజల్లో ఉండి.. సమస్యలు పరిష్కరిస్తూ మంచి నేతలుగా ఎదగాలని కేసీఆర్ దిశానిర్దేశం చేశారు. ప్రజల్లో నమ్మకం సాధిస్తే.. ప్రతి ఎన్నికల్లోనూ గెలిచే పరిస్థితి ఉంటుందన్నారు.

ప్రజలకు అర్థమయ్యేలా వివరించాలి

రెవెన్యూ, మున్సిపల్ చట్టాలపై ప్రజల్లో ఎక్కడైనా అపోహలు ఉంటే వాటిని తొలగించాలని పార్టీ ప్రజా ప్రతినిధులకు ముఖ్యమంత్రి కేసీఆర్ సూచించారు. ప్రజలను పీడిస్తున్న అవినీతికి చరమగీతం పలికేందుకే ఈ కొత్త చట్టాలను రూపొందించామని.. ప్రజలకు అర్థమయ్యేలా వివరించాలన్నారు. ఎల్ఆర్ఎస్ పై ప్రజల్లో ఎలాంటి అభిప్రాయం ఉందని కేసీఆర్ ఆరా తీశారు. ఎల్ఆర్ఎస్ పట్ల ప్రజలు సంతోషంగా ఉన్నారని.. అందుకే మంచి స్పందన వస్తోందని ఎమ్మెల్యేలు, ఎమ్మెల్సీలు తెలిపారు. సర్వే గడువును మరింత పెంచాలని సీఎంను వారు కోరారు. పరిస్థితిని బట్టి నిర్ణయం తీసుకుందామన్న సీఎం.. అన్ని రకాల భూములు రికార్డుల్లోకి ఎక్కాల్సిందేనని స్పష్టం చేశారు. క్షేత్రస్థాయిలో ఎక్కడైనా ఇబ్బందులు ఉంటే పరిష్కరించి.. ఆస్తుల నమోదుకు చొరవ తీసుకోవాలన్నారు. అవసరమైతే మరోసారి ప్రత్యేక అసెంబ్లీ సమావేశాలు నిర్వహించుకుందామని కేసీఆర్ చెప్పారు.

ఇదీ చదవండి: దుబ్బాక ఉప ఎన్నికల్లో పోటీకి భాజపా రెడీ: కిషన్​రెడ్డి