వైద్యవిద్యలో కొత్త అధ్యాయం.. 8 వైద్య కళాశాలలకు నేడు కేసీఆర్ శ్రీకారం

Medical Colleges Inauguration: రాష్ట్ర వైద్యవిద్యలో నేడు కొత్త అధ్యాయం ప్రారంభం కానుంది. 8 నూతన ప్రభుత్వ వైద్య కళాశాలల్లో ఏకకాలంలో తరగతులు ప్రారంభం కానున్నాయి. హైదరాబాద్ ప్రగతిభవన్ నుంచి ముఖ్యమంత్రి కేసీఆర్ ఆన్​లైన్ విధానంలో తరగతులను ప్రారంభిస్తారు. రాష్ట్రంలో ప్రభుత్వ వైద్యకళాశాలల సంఖ్య 17కు పెరగగా... కొత్త కళాశాలలతో అదనంగా 1,150 మంది విద్యార్థులకు వైద్యవిద్య అందనుంది.

Medical Colleges Inauguration: రాష్ట్రంలో నేడు ఒక్కరోజే ఎనిమిది కొత్త ప్రభుత్వ వైద్య కళాశాలల్లో తరగతులు ప్రారంభం కానున్నాయి. మంచిర్యాల, రామగుండం, జగిత్యాల, భద్రాద్రి కొత్తగూడెం, వనపర్తి, నాగర్‌ కర్నూల్‌, మహబూబాబాద్‌, సంగారెడ్డి వైద్యకళాశాలల్లో విద్యాబోధనకు నేటి నుంచి శ్రీకారం చుట్టనున్నారు. ఎనిమిది కళాశాలల్లోనూ ఏకకాలంలో హైదరాబాద్ ప్రగతిభవన్ నుంచి సీఎం కేసీఆర్ ఆన్​లైన్ విధానం ద్వారా ప్రారంభించనున్నారు. దేశ వైద్యరంగంలో తెలంగాణ నూతన విప్లవానికి శ్రీకారం చుడుతోందని... దేశ చరిత్రలో ఇదో అరుదైన సందర్భమని ప్రభుత్వ వర్గాలు అంటున్నాయి.

తెలంగాణ రాష్ట్ర ఆవిర్భావం వరకు ఐదు ప్రభుత్వ కళాశాలలు ఉన్నాయి. 1946లో ఉస్మానియా, 1956లో గాంధీ వైద్య కళాశాలలు ఏర్పాటు కాగా... 1959లో వరంగల్​లో కాకతీయ వైద్యకళాశాలను ఏర్పాటు చేశారు. ఆ త‌ర్వాత 2008లో ఆదిలాబాద్‌ రిమ్స్‌, 2012లో నిజామాబాద్​లో ప్రభుత్వ వైద్య కళాశాలలు ఏర్పాటయ్యాయి. కేవలం ఐదు ప్రభుత్వ వైద్య కళాశాలలు ఉండడంతో 850 సీట్లు మాత్రమే అందుబాటులో ఉండేవి. వైద్య కళాశాలలు లేక, సూప‌ర్ స్పెషాలిటీ వైద్యం అంద‌క ప్రజలు ఎంతో ఇబ్బంది పడేవారు. ఏదైనా పెద్ద వ్యాధి వ‌స్తే చికిత్స పొందాల‌న్నా.. మెరుగైన వైద్యం దొర‌కాల‌న్నా హైద‌రాబాద్​కు ప‌రిగెత్తాల్సి వ‌చ్చేది.

గ్రామీణ ప్రాంతాల ప్రజలకు సూప‌ర్ స్పెషాలిటీ వైద్యం అంద‌ని ద్రాక్షగా ఉండేది. తక్కువ సీట్లు అందుబాటులో ఉండడంతో రాష్ట్ర విద్యార్థులకు మెడిసిన్‌ విద్య కష్టతరంగా ఉండేది. స్వరాష్ట్రంలో సూప‌ర్ స్పెషాలిటీ వైద్యసేవ‌ల‌ను పేద‌లకు చేరువ చేయ‌డంతో పాటు వైద్యవిద్య అందుబాటులో ఉండేలా ప్రతి జిల్లాకు ఒక ప్రభుత్వ వైద్య కళాశాల ఏర్పాటు చేయాలని ముఖ్యమంత్రి కేసీఆర్ నిర్ణయించారు. అందుకు అనుగుణంగా రాష్ట్రం ఆవిర్భవించిన తొలి నాళ్లలోనే మహబూబ్‌ నగర్‌, సిద్దిపేటలో ప్రభుత్వ వైద్యకళాశాలలు ఏర్పాటు చేశారు. ఆ తర్వాతి దశలో నల్గొండ, సూర్యాపేటలోనూ ప్రభుత్వ వైద్యకళాశాలలు ఏర్పాటయ్యాయి. కొత్తగా ఏర్పాటైన నాలుగు కళాశాలలతో రాష్ట్రంలో ప్రభుత్వ వైద్యకళాశాలల సంఖ్య తొమ్మిదికి చేరింది. దీంతో ఎంబీబీఎస్ సీట్ల సంఖ్య కూడా పెరిగింది.

పెరిగిన ఎంబీబీఎస్ సీట్ల సంఖ్య.. రెండో దశలో మరో ఎనిమిది ప్రభుత్వ వైద్యకళాశాలలు ఏర్పాటు చేయాలని నిర్ణయించి అందుకు అనుగుణంగా చర్యలు తీసుకున్నారు. మంచిర్యాల, రామగుండం, జగిత్యాల, కొత్తగూడెం, వనపర్తి, నాగర్‌ కర్నూల్‌, మహబూబాబాద్‌, సంగారెడ్డిలో నూతన వైద్యకళాశాలలు నిర్మించారు. కళాశాలల పనులు పూర్తై అనుమతులు కూడా రావడంతో విద్యాసంవత్సరం ప్రారంభం అవుతోంది. దీంతో రాష్ట్రంలో ప్రభుత్వ వైద్యకళాశాలల సంఖ్య 17కు పెరిగింది. ఒక్కో వైద్య కళాశాలలో 150 చొప్పున ఎంబీబీఎస్ సీట్లు ఉన్నాయి. ఒక్క మంచిర్యాలలో మాత్రం వంద సీట్లకు అనుమతి ఇచ్చారు. దీంతో అదనంగా 1,150 ఎంబీబీఎస్ సీట్లు అందుబాటులోకి వస్తున్నాయి. 2014లో 850గా ఉన్న ఎంబీబీఎస్‌ సీట్లు ఇప్పుడు 2,790కి పెరిగాయి. అటు రాష్ట్రంలో పీజీ సీట్లు కూడా 531 నుంచి 1122కు పెరిగాయి. సూపర్‌ స్పెషాలిటీ సీట్లు 76 నుంచి 152కు పెరిగాయి.

వైద్య విద్య చదవాలనుకునే వారికి పెరిగిన అవకాశాలు.. కొత్తగా విద్యా సంవత్సరం ప్రారంభం అవుతున్న ఎనిమిది వైద్య కళాశాలల్లోనూ నేటి నుంచి తరగతులు ప్రారంభం కానున్నాయి. ముఖ్యమంత్రి కేసీఆర్ హైదరాబాద్​లోని ప్రగతిభవన్ నుంచి ఆన్​లైన్ విధానంలో ఏకకాలంలో ఎనిమిది కళాశాలల్లోనూ తరగతులను ప్రారంభిస్తారు. కొత్త వైద్యకళాశాలల ఏర్పాటుతో ప్రజలకు సూపర్ స్పెషాలిటీ వైద్యం అందుబాటులోకి రానుంది. మొత్తం 35 వైద్యవిభాగాలు సేవ‌లందిస్తాయి. అత్యాధునిక వైద్య ప‌రిక‌రాలు, ల్యాబ్స్ ఉంటాయి. ఎంబీబీఎస్ సీట్ల సంఖ్య భారీగా పెరగడంతో రాష్ట్రంలో వైద్యవిద్య చదవాలనుకునే విద్యార్థులకు అవకాశాలు పెరగనున్నాయి. 17 ప్రభుత్వ వైద్యకళాశాలలకు తోడు మరో 17 కళాశాలలను కూడా ఏర్పాటు చేయాలని రాష్ట్ర ప్రభుత్వం ఇప్పటికే నిర్ణయించింది. వచ్చే సంవత్సరం మరో తొమ్మిది, ఆ తదుపరి ఏడాది మరో ఎనిమిది ప్రభుత్వ వైద్యకళాశాలలు ఏర్పాటు చేయాలని లక్ష్యంగా పెట్టుకొంది. తద్వారా ప్రతి జిల్లాలో ఒక ప్రభుత్వ వైద్య కళాశాల లక్ష్యం నెరవేరనుంది.

ఇవీ చదవండి: