స్వాతంత్ర్య దినోత్సవం రోజు జాతీయ జెండాను ఎగురవేసేందుకు, ర్యాలీ నిర్వహించేందుకు పోలీసుల అనుమతి తీసుకోవాల్సిన దౌర్భాగ్య పరిస్థితి.. రాష్ట్రంలో ఉండటం బాధాకరమని హైదరాబాద్ గోషామహల్ ఎమ్మెల్యే రాజాసింగ్ అన్నారు. రేపు పంద్రాగస్టు సందర్భంగా ర్యాలీకి అనుమతి ఇవ్వాలని భగత్ సింగ్ యువసేన అధ్యక్షుడు శైనథ్గంజ్ పోలీసులను కోరితే వారు నిరాకరించడం పట్ల అసహనం వ్యక్తం చేశారు. ఏ రాష్ట్రంలో కూడా ఇలాంటి పరిస్థితి లేదని రాజాసింగ్ వ్యాఖ్యానించారు.
ప్రతి సంవత్సరం గోషామహల్ నియోజకవర్గంలోని షహినయాత్గంజ్ పోలీస్ స్టేష్న్ పరిధిలో ఆగస్టు 15న చిన్నపాటి ర్యాలీ తీస్తారని రాజాసింగ్ అన్నారు. జాతీయ పతాకాలతో ఆ ప్రాంతమంతా సందడిగా ఉంటుందని చెప్పారు. రెండేళ్ల క్రితం ర్యాలీ తీసినందుకు ట్రాఫిక్ జామ్ అయిందనే సాకుతో కొందరిపై కేసులు నమోదు చేశారని పేర్కొన్నారు. ఈ సారి కూడా అనుమతి అడిగితే పోలీసులు నిరాకరించారని వెల్లడించారు. రాష్ట్రంలో కేసీఆర్ ప్రభుత్వం వచ్చాక జాతీయ పతాకం ఎగురవేయాలంటే అనుమతి తీసుకోవాల్సి రావడం సిగ్గుచేటని రాజాసింగ్ మండిపడ్డారు. కేసులు పెడతాం, రౌడీషీట్ తెరుస్తామని బెదిరించడం పట్ల ఆగ్రహం వ్యక్తం చేశారు.
రెండేళ్ల క్రితం ర్యాలీ తీస్తే కేసులు పెట్టారు. ఈసారి అనుమతి తీసుకోము. జెండా ఎగురవేసి ర్యాలీ తీస్తాం. ఏం చేస్తారో చూస్తాం. కేసులు పెడతారా చూద్దాం.. దీని ద్వారా యావత్ దేశానికి తెలంగాణలో కేసీఆర్ పాలనలోని అరాచకాలను తెలియజేస్తాం. -రాజాసింగ్, గోషామహల్ ఎమ్మెల్యే
అనుమతి కోసం కమిషనర్ను అడిగితే ఇస్తారని పోలీసులు చెబుతున్నారని రాజాసింగ్ ఆరోపించారు. జాతీయ పతాకాన్ని ఎగరవేస్తే కేసులు పెడతాం, రౌడీషీట్ తెరుస్తామని పోలీసులు బెదిరిస్తున్నారని మండిపడ్డారు. డీజీపీ, కమిషనర్.. ఇలాంటి పోలీసు అధికారులపైన చర్యలు తీసుకోవాలని రాజాసింగ్ డిమాండ్‌ చేశారు.
ఇదీ చదవండి: REAL ESTATE: హైటెక్స్లో క్రెడాయ్ ప్రాపర్టీ షో.. మూడు రోజుల పాటు ప్రదర్శన
