'పాత్రికేయులందరికీ కరోనా పరీక్షలు నిర్వహించాలి'

తెరాస ప్రభుత్వం మొద్దు నిద్ర వదిలి కరోనా కట్టడిపై అప్రమత్తంగా ఉండాలని భాజపా రాష్ట్ర అధ్యక్షుడు బండి సంజయ్​ సూచించారు. రాష్ట్రంలోని మీడియా ప్రతినిధులందరికీ కరోనా పరీక్షలు నిర్వహించాలని కోరారు.

రాష్ట్రంలోని మీడియా రిపోర్టర్లందరకీ ప్రభుత్వమే ఆరోగ్య రక్షణ కల్పించాలని భాజపా రాష్ట్ర అధ్యక్షుడు బండి సంజయ్‌ డిమాండ్ చేశారు. పాత్రికేయులందరికీ యుద్ధ ప్రాతిపదికన కరోనా పరీక్షలు నిర్వహించాలని సర్కారుకు సూచించారు.

ఓ ఎలక్ట్రానిక్​ మీడియా సంస్థకు చెందిన క్రైమ్ రిపోర్టర్ కరోనాతో మృతి చెందడం తనను కలిచి వేసిందన్నారు. ఈ ఘటన చాలా బాధాకరమని సంజయ్‌ ఆవేదన వ్యక్తం చేశారు. లాక్‌డౌన్ సమయంలోనూ కరోనాపై పోరాడేందుకు కావాల్సిన సమాచారాన్ని చేరవేసిన మీడియా ప్రతినిధులు కూడా కొవిడ్-19 వారియర్సేనని ఆయన పేర్కొన్నారు. వారిని ప్రత్యేక దృష్టితో చూసి ఆరోగ్య రక్షణకు ప్రత్యేక చర్యలు చేపట్టాలన్నారు.