నవరాత్రులకు హైదరాబాద్ బాలాపూర్ వినాయకుడు ముస్తాబవుతున్నాడు. కరోనా పరిస్థితుల దృష్ట్యా బాలాపూర్ గణేశ్ విగ్రహం ఎత్తును ఆరడుగులకు తగ్గించి మండపంలో కొలువుదీర్చారు. ధూల్పేటలో తయారు చేసిన లంబోదరుణ్ని బాలాపూర్ గణేశ్ ఉత్సవ కమిటీ సభ్యులు మండపానికి చేర్చారు. గాలిగోపురం తరహాలో మండపాన్ని సుందరంగా తీర్చిదిద్దారు.
కొవిడ్ నిబంధనల దృష్ట్యా మొదటిసారిగా బాలాపూర్ గణేశ్ ఉత్సవాలు నిరాడంబరంగా నిర్వహిస్తున్నట్లు ఉత్సవ కమిటీ సభ్యులు తెలిపారు. లడ్డూ వేలం పాటనూ రద్దు చేసినట్లు వెల్లడించారు. నవరాత్రులయ్యాకు పోలీసులు అనుమతిస్తే బాలాపూర్ గణేశుణ్ని వినాయకసాగర్ వైపు శోభాయాత్రగా తీసుకెళ్తామని ఉత్సవ కమిటీ అధ్యక్షుడు నిరంజన్ రెడ్డి చెప్పారు.
