A Young Man Arrested for Cheating Young Women : ఇద్దరితో సహజీవనం.. మరో యువతితో నిశ్చితార్థానికి సిద్ధం.. కట్​ చేస్తే..!

A Young Man Arrested for Cheating Young Women in Hyderabad : ఇద్దరు యువతులను ప్రేమించాడు. పెళ్లి పేరు చెప్పి.. ఒకరికి తెలియకుండా మరొకరితో వేర్వేరు ప్రాంతాల్లో సహజీవనం చేశాడు. చివరకు ఆ ఇద్దరినీ కాదని.. మరో యువతితో నిశ్చితార్థానికి సిద్ధమయ్యాడు. బాధిత యువతి పీఎస్​ను ఆశ్రయించడంతో సరిగ్గా ఎంగేజ్​మెంట్​ రోజే కటకటాలపాలయ్యాడు.

A Young Man Arrested for cheating Young Women in Hyderabad : పెళ్లి పందిళ్లలో 'ఆపండి..' అనే డైలాగ్​ మనం ఎన్నో సినిమాల్లో చూసుంటాం.. విని ఉంటాం. సరిగ్గా వరుడు.. వధువు మెడలో తాళి కడుతుండగా.. ఎవరో ఒకరు వచ్చి 'ఆపండి.. ఈ పెళ్లి జరగడానికి వీల్లేదు' అనడం మామూలే. అచ్చం అలాంటి సీనే నిజ జీవితంలో జరిగింది. కాకపోతే ఇక్కడ నిశ్చితార్థం జరుగుతుండగా.. పోలీసులు రంగప్రవేశం చేశారు. ఉంగరాలు మార్చుకుంటుండగా.. 'యు ఆర్​ అండర్​ అరెస్ట్'​ అంటూ వరుడికి షాక్​ ఇచ్చారు. ఏపీలోని కడప జిల్లాలో ఈ ఘటన చోటుచేసుకుంది.

వివరాల్లోకి వెళితే.. ఆంధ్రప్రదేశ్​లోని కడప జిల్లా రాయచోటికి చెందిన బాబా ఫక్రుద్దీన్ అలియాస్ బాషా (25) హైదరాబాద్​లోని మాదాపూర్​లో నివాసం ఉంటున్నాడు. బంజారాహిల్స్​లోని ఓ చిల్డ్రన్స్ హాస్పిటల్ క్యాంటీన్​లో వెయిటర్​గా పని చేస్తున్నాడు. ఈ క్రమంలో అక్కడే పని చేసే ఓ యువతితో ఏర్పడిన పరిచయం కాస్తా.. ప్రేమగా మారింది. పెళ్లి చేసుకుంటానని నమ్మించిన బాషా.. రహమత్​నగర్ పరిధి​లోని జవహర్ నగర్​లో ఓ గది అద్దెకు తీసుకుని ఆమెతో సహజీవనం చేశాడు. ఏడాది క్రితం మరో ఆసుపత్రికి బదిలీ అయ్యాడు. అక్కడ మరో యువతిని లొంగదీసుకుని.. ఈసారి కార్ఖానా ప్రాంతంలో రూమ్​ రెంట్​కు తీసుకుని సహజీవనం ప్రారంభించాడు.

ఇంతకాలం ఏదో ఒకటి చెప్తూ మొదటి యువతిని మేనేజ్​ చేస్తూ వచ్చిన బాషా.. ఈ నెల 6 నుంచి ఆమె ఫోన్​ చేస్తున్నా స్పందించడం లేదు. దీంతో ఆ యువతి మధురానగర్​ పోలీసులను ఆశ్రయించింది. తాజాగా రెండో యువతిని సైతం బాషా దూరం పెట్టడంతో అతడి గురించి యువతి ఆరా తీసింది. ఈ క్రమంలో మధురానగర్​ పీఎస్​లో మొదటి యువతి పెట్టిన కేసు గురించి తెలుసుకుంది. జవహర్​నగర్​ యువతి ఫిర్యాదు మేరకు కేసు నమోదు చేసుకున్న పోలీసులు.. దర్యాప్తు ప్రారంభించారు. కడప జిల్లా రాయచోటిలోని ఓ ఆర్టీసీ ఉద్యోగి కుమార్తెతో బాషా ఎంగేజ్​మెంట్​ జరుగుతుందని తెలుసుకున్న ఎస్సై ఇక్బాల్.. అక్కడికి చేరుకుని నిశ్చితార్థం ఆపించారు. నిందితుడిని అదుపులోకి తీసుకుని హైదరాబాద్​ తీసుకొచ్చారు.

పోలీసులు నిందితుడిని హైదరాబాద్​కు తీసుకొచ్చాక.. అసలు కథ మొదలైంది. ప్రేమ పేరు చెప్పి తననూ మోసగించాడంటూ కార్ఖానా (రెండో) యువతి పోలీసులను ఆశ్రయించింది. అయితే నిందితుడిపై మొదట కేసు తానే పెట్టినందున తననే పెళ్లి చేసుకోవాలని జవహర్​నగర్ యువతి పట్టుబట్టింది. మొదటగా ప్రేమించింది తననేనని.. తననే వివాహం చేసుకోవాలంటూ రెండో యువతి బీష్మించుకు కూర్చుంది. ఒకానొక దశలో ఇద్దరు యువతులు వాగ్వివాదానికి దిగారు. చివరకు పోలీసులు వారిని అక్కడి నుంచి పంపించి.. నిందితుడిని చంచల్​గూడ జైలుకు తరలించారు. ఈ ఇద్దరు యువతులతో పాటు ఇంకెవరినైనా ప్రేమ పేరుతో మోసం చేశాడా అనే కోణంలో విచారణ సాగిస్తున్నారు.