అంబర్పేటకు చెందిన భాజపా నేత కుమారుడు నరసింగరావు అనారోగ్యానికి గురయ్యాడు. పరీక్ష చేయిస్తే కొవిడ్ అని తేలింది. పదిరోజుల క్రితం సికింద్రాబాద్లోని యశోద ఆసుపత్రికి తీసుకెళ్లారు.
ఇప్పటివరకూ సుమారు రూ.8 లక్షలు చెల్లించారు. బుధవారం ఆసుపత్రి నుంచి కుటుంబ సభ్యులకు ఫోన్ వచ్చింది. నరసింగరావు చనిపోయారని చెప్పారు. మరో రూ.5 లక్షలు చెల్లించి డెడ్బాడీని తీసుకెళ్లాలని సూచించారు.
కుటుంబ సభ్యులు బోరున విలపించారు. ఓ వైపు డబ్బులు సిద్ధం చేస్తూనే.. దహన సంస్కారాలని ఏర్పాట్లు చేసుకున్నారు. బంధువులు, శ్రేయోభిలాషులకు దుర్వార్తను చేరవేశారు.
కుటుంబ సభ్యులకు సందేహం కలిగి మరోసారి ఆసుపత్రిలో విచారించగా అదంతా అబద్దమని తేలింది. నరసింగరావు బతికే ఉన్నారని తెలిసింది. వీడియో కాల్లో ఆయన్ని చూసి అందరూ ఊపిరి పీల్చుకున్నారు. కంగుతిన్న కుటుంబ సభ్యులు సంతోషంతో కన్నీరు కార్చారు. డబ్బుల కోసం ఇంతకు దిగజారిన యశోద యాజమాన్యంపై కుటుంబ సభ్యులు ఆగ్రహం వ్యక్తం చేశారు.
అంతా అబద్దం...
ఈ ఘటనపై యశోద యాజమాన్యం మాత్రం మరోలా స్పందించింది. తమ ఆసుపత్రిలో నర్సింగ్ అనే వ్యక్తి చనిపోయాడని ఎవరికీ చెప్పలేదని పేర్కొంది. కావాలనే దుష్ప్రచారం చేస్తున్నారని ఆరోపించింది. చనిపోయాడని చెబితే, వీడియో కాల్ చేసి ఎందుకు చూపిస్తామని యశోద ఆసుపత్రి పీఆర్ఓ సంపత్ ప్రశ్నించారు.
ఇదీ చదవండి : ప్యాలెస్‌ ఆఫ్‌ వర్సైల్స్‌ స్ఫూర్తిగా నూతన సచివాలయం
