Kothagudem MLA Election On HC : వనమా VS జలగం.. కొత్తగూడెం ఎమ్మెల్యే ఎవరు..?

Kothagudem MLA election controversy : కొత్తగూడెం ఎమ్మెల్యే వనమా వెంకటేశ్వరరావు ఎన్నిక వివాదం ఇంకా సర్దుమనగలేదు. వనమా ఎన్నికను రద్దు చేస్తూ హైకోర్టు మంగళవారం తీర్పు ఇవ్వగా.. దానిని సవాల్​ చేస్తూ ఆయన మరలా హైకోర్టును ఆశ్రయించారు. సుప్రీం కోర్టులో అప్పీలు చేసేందుకు వీలుగా 30 రోజులు లేదా తీర్పు సర్టిఫయిడ్ కాపీ తీసుకొనే వరకు సస్పెండ్ చేయాలని లంచ్‌మోషన్ దాఖలు చేశారు. దీనిపై విచారణ జరిపిన న్యాయస్థానం తీర్పును రిజర్వ్​ చేసింది. మరోవైపు జలగం వెంకట్రావు తనను కొత్తగూడెం ఎమ్మెల్యేగా ప్రమాణ స్వీకరించాలని సభాపతిని కోరారు.

Vanama Venkateswara Rao election controversy : శాసనసభ ఎన్నికలు సమీపిస్తున్న వేళ ఉమ్మడి ఖమ్మం రాజకీయాలు ఒక్కసారిగా వేడెక్కాయి. మాజీ ఎంపీ పొంగులేటి శ్రీనివాస్​ హస్తం గూటికి చేరడం.. ఇంటింటికి బీజేపీ పేరుతో కమళ దళం వ్యూహం మార్చడంతో ఖమ్మంలో బీఆర్​ఎస్​కు కొత్త సవాల్​లు ఎదురవుతున్నాయనే చెప్పొచ్చు. తాజాగా కొత్తగూడెం ఎమ్మెల్యే వనమా వెంకటేశ్వరరావు ఎన్నికపై హైకోర్టు మంగళవారం ఇచ్చిన తీర్పుతో మరోసారి బీఆర్​ఎస్​కు గట్టి షాక్​ తగిలిందనే చెప్పొచ్చు. ఎమ్మెల్యే ఎన్నిక వివాదంపై న్యాయస్థానాన్ని ఆశ్రయించిన ఇరువురు ఒకే పార్టీకి చెందడంతో సొంతపార్టీ నేతల్లోనే అభిప్రాయ భేదాలు వస్తున్నాయి. ఖమ్మం గులాబీ నేతల్లో ఆధిపత్య పోరు నడుస్తోందని టాక్​ బాగా వినిపిస్తోంది.

ఇది ఇలా ఉండగా.. వనమా వెంకటేశ్వరరావు ఎన్నికపై హైకోర్టు తీర్పును సవాల్​ చేస్తూ మరోసారి ఆయన న్యాయస్థానాన్ని ఆశ్రయించారు. తీర్పును తాత్కాలికంగా నిలిపివేయాలని కోరుతూ వనమా హైకోర్టును ఆశ్రయించారు. సుప్రీంకోర్టులో అప్పీలు చేసేందుకు వీలుగా 30 రోజులు లేదా తీర్పు సర్టిఫయిడ్ కాపీ తీసుకొనే వరకు సస్పెండ్ చేయాలని బుధవారం లంచ్‌మోషన్ పిటిషన్​ దాఖలు చేశారు. వనమా అభ్యర్థన మేరకు పిటిషన్‌పై హైకోర్టు అత్యవసర విచారణ జరిపింది. వనమా అభ్యర్థనపై జలగం వెంకట్రావు న్యాయవాది రమేష్ వాదించారు. ఇరువైపుల వాదనలు విన్న హైకోర్టు తీర్పును రిజర్వ్ చేసింది.

మరోవైపు కొత్తగూడెం ఎమ్మెల్యేగా తనను ప్రకటిస్తూ గెజిట్ విడుదల చేయాలని రాష్ట్ర ప్రధాన ఎన్నికల అధికారిని జలగం వెంకట్రావు కోరారు. బీఆర్కే భవన్‌లో రాష్ట్ర ప్రధాన ఎన్నికల అధికారిని జలగం వెంకట్రావు కలిశారు. వనమా వెంకటేశ్వరరావు ఎన్నికను రద్దు చేస్తూ.. హైకోర్టు తనను ఎమ్మెల్యేగా ప్రకటించిందని సీఈవోకు వివరించి తీర్పు ప్రతిని సమర్పించారు. గెజిట్ జారీ ప్రక్రియ నిర్వహించాలని సీఈవోను కోరారు.

Jalagam Venkatarao election controversy : అంతకు ముందు సభాపతి పోచారం శ్రీనివాస్​ రెడ్డితో ఫొన్​లో మాట్లాడారు. స్పీకర్​ కార్యాలయంలో హైకోర్టు తీర్పును సమర్పించారు. అసెంబ్లీ కార్యదర్శిని నేరుగా కలిసి ప్రమాణ స్వీకరణకు సంబంధించిన ప్రక్రియను వివరించారు. తనతో కొత్తగూడెం ఎమ్మెల్యేగా ప్రమాణం స్వీకరణ చేయించాలని కోరారు.

ఎన్నికల గడువు మూడు నెలలు మాత్రమే ఉండగా కొత్తగూడెం బీఆర్ఎస్ ఎమ్మెల్యే టికెట్ ఎవరికి అనేదానిపై సర్వత్రా ఆసక్తి నెలకొంది. వృద్ధాప్యం, వనమాపై హైకోర్టు తీర్పుతో టికెట్ అవకాశాలు అంతంతమాత్రంగానే ఉన్నట్లు పార్టీలో టాక్​. ఆయనకు కాకుండా వనమా కుమారుడు రాఘవకు ఇచ్చే అవకాశాలున్నాయంటే అది కూడా చాలా తక్కువ ఉన్నట్లుగానే తెలుస్తోంది. గత సంవత్సరం జనవరిలో నాగ రామకృష్ణ కుటుంబం ఆత్మహత్యకు ఘటనలో రాఘవ ఏ-2గా ఉన్నారు. అలాగే అతనిపై పలు కేసులు ఉండడంతో రాఘవకు టికెట్ రావడం కష్టంగానే చెప్పుకోవచ్చు. మరోనేత డైరెక్టర్ ఆఫ్ హెల్త్ గడల శ్రీనివాస్‌రావు కొత్తగూడెం ఎమ్మెల్యే టికెట్ రేసులో ఉన్నట్లు సమాచారం.

ఇవీ చదవండి: