భద్రాద్రి కొత్తగూడెం జిల్లాలో రబీలో అన్ని పంటలు కలిపి 35,740 హెక్టార్లలో సాగు చేశారు. ఇందులో వరి 25,195, మొక్కజొన్న 5,757 హెక్టార్లు ఉంది. శనివారం కురిసిన అకాల వర్షం ప్రభావంతో జిల్లాలో మొత్తంమీద సుమారు 20 వేల ఎకరాల్లో పంటనష్టం వాటిల్లింది. మరో 32 హెక్టార్ల ఉద్యాన పంటలకు నష్టం చేకూరినట్లు అధికారులు అధికారికంగా గుర్తించారు.
అశ్వారావుపేట మండలంలో 6 హెక్టార్లు(అరటి)లో, దమ్మపేటలో 10, జూలూరుపాడు 2, ములకలపల్లి 10, బూర్గంపాడులో 4 హెక్టార్ల(బొప్పాయి)లో పంట దెబ్బతింది. ఉద్యానాధికారులు 32 హెక్టార్లలో నష్టాన్ని అంచనా వేయగా.. అశ్వారావుపేటలో 40 ఎకరాల్లో అరటి, 70 ఎకరాల్లో మామిడి, 15 ఎకరాల్లో కూరగాయల, దమ్మపేటలో 40 ఎకరాల్లో అరటి, 80 ఎకరాల్లో మామిడి, అశ్వాపురంలో 20 ఎకరాల్లో మామిడి తోటలకు నష్టం వాటిల్లినట్లు బాధిత రైతులు వాపోయారు. అశ్వారావుపేట-నారంవారిగూడెం మధ్య ఆయిల్‌పాం చెట్లు నేలకూలాయి.
ఏఏ మండలాల్లో ఎంత నష్టం..
దమ్మపేట మండలంలో 110 ఎకరాల్లో మొక్కజొన్న నేలవాలింది. అశ్వాపురం మండలం తుమ్మల చెరువు ఆయకట్టు పరిధిలో కుందారం, చెదలవాడ కాలువల కింద 2,500 ఎకరాల్లో కోతకు వచ్చిన వరిపైరు నేలకొరిగింది. ఒక్క అశ్వాపురంలోనే 812 ఎకరాల్లోని పైరులో 33 శాతం నష్టం వాటిల్లినట్లు అధికారులు తెలిపారు. అశ్వారావుపేట, దమ్మపేట మండలాల్లో సుమారు 151 ఎకరాల్లో మొక్కజొన్న, మరో 80 ఎకరాల్లో వరి, బూర్గంపాడులో 5 ఎకరాల్లో మొక్కజొన్న దెబ్బతిన్నట్లు రైతులు పేర్కొన్నారు.
తడిసిన ధాన్యం రాశులు
ములకలపల్లిలో 130 క్వింటాళ్లు, చంద్రుగొండ మండలం మద్దుకూరు, దామరచర్లలో 600 బస్తాలు, అన్నపురెడ్డిపల్లి మండలం గుంపెన, అబ్బుగూడెంలో 400 బస్తాల ధాన్యం తడిసింది. ఆయా ప్రాంతాలను ఏడీ అఫ్జల్‌బేగ్‌ ఆదివారం పరిశీలించారు. సత్తుపల్లి మండలం కాకర్లపల్లి, రుద్రాక్షపల్లి, బుగ్గపాడులో మరో 600 బస్తాల ధాన్యం తడిసినట్లు రైతులు పేర్కొన్నారు. పంట నష్టం అంచనా వేసేందుకు ఆదివారం అదనపు కలెక్టర్‌ కె.వెంకటేశ్వర్లు మణుగూరు, పినపాక, కరకగూడెం మండలాల్లో, ఉద్యాన శాఖ అధికారిణి శాంతి ప్రియ బూర్గంపాడులో, ఏడీఏ తాతారావు అశ్వాపురంలో పర్యటించారు. పంట క్షేత్రాలను సందర్శించి నష్టాన్ని అంచనా వేశారు.
విద్యుత్తు సరఫరాకు అంతరాయం
ఈదురు గాలుల ధాటికి పలు మండలాల్లో 50 విద్యుత్తు స్తంభాలు నేలకొరిగాయి. రెండు నియంత్రికలు దెబ్బతిన్నాయి. పిడుగులు పడటంతో 17 ఇన్సులేటర్లు ధ్వంసమయ్యాయి. శనివారం రాత్రి నుంచే ఆ శాఖ సిబ్బంది మరమ్మతులు చేసి సరఫరాను పునరుద్ధరించారు. అశ్వాపురం, మణుగూరు మండలాల్లో 18 ఇళ్ల పైకప్పులు దెబ్బతిన్నాయి.
ధాన్యం కొనుగోలు కేంద్రాలకు అవసరమైన గన్నీ సంచులను తక్షణమే సరఫరా చేయాలని అశ్వారావుపేట ఎమ్మెల్యే మెచ్చా నాగేశ్వరరావు అదనపు కలెక్టర్‌ వెంకటేశ్వర్లుకు చరవాణిలో సూచించారు. దామరచర్లలోని ధాన్యం కొనుగోలు కేంద్రాన్ని ఆదివారం ఆయన పరిశీలించారు.
గాలివానకు నేలరాలిన మామిడి కాయలు
పాల్వంచ మండలంలో వంద ఎకరాల్లో కోతకు వచ్చిన వరి పైరు నేలమట్టమైంది. పలు గ్రామాల్లో కళ్లాల్లోని ధాన్యం తడిసి ముద్దయ్యింది. ఏవో శంభోశంకర్‌, ఏఈవోలు చంద్రాలగూడెం, రేగులగూడెం, సోములగూడెం, సూరారం, రెడ్డిగూడెం ప్రాంతాల్లో వరి, మొక్కజొన్న పంటనష్టం అంచనాలు రూపొందించారు. డీసీఎంఎస్‌ ఉపాధ్యక్షుడు కె.శ్రీనివాసరావు రెడ్డిగూడెం, జగన్నాథపురం, దంతెలబోర ధాన్యం కొనుగోలు కేంద్రాల్లో పరిశీలించారు.
చర్లలో వర్షం
చర్లలో ఆదివారం సాయంత్రం భారీ వర్షం కురిసింది. మండలంలో మిరప, ధాన్యం తడిచి రైతులకు నష్టం వాటిల్లింది. రైతులు కళ్లాల్లో ఆరబోసిన మిరపతో పాటు ఆరబెట్టిన ధాన్యం తడిచిపోయింది.
ఇవీ చూడండి: సుజల దృశ్యం.. సీఎం కేసీఆర్‌తో సాక్షాత్కారం: కేటీఆర్
