ఆస్ట్రేలియన్ ఓపెన్ పురుషుల సింగిల్స్లో సెర్బియా వీరుడు నొవాక్ జకోవిచ్ క్వార్టర్ ఫైనల్లోకి దూసుకెళ్లాడు. గతంలో ఎనిమిది సార్లు ఈ గ్రాండ్స్లామ్ను సొంతం చేసుకున్న ఈ ఆటగాడు.. రౌనిక్(2016- వింబుల్డన్ ఫైనలిస్ట్)ను ఓడించాడు. నాలుగు సెట్ల పాటు హోరాహోరీగా సాగిన ఈ గేమ్లో 7-6(4), 4-6, 6-1, 6-4 తేడాతో ప్రత్యర్థిపై పైచేయి సాధించి.. 300వ గ్రాండ్స్లామ్ విజయాన్ని కైవసం చేసుకున్నాడు. రోజర్ ఫెదరర్ తర్వాత ఈ మైలురాయిని అందుకున్న రెండో ఆటగాడిగా ఈ సెర్బియా వీరుడు ఘనత సాధించాడు. గాయంతో శనివారం ప్రాక్టీస్కు దూరమైన నొవాక్.. పూర్తిగా కోలుకోకుండానే బరిలోకి దిగి అద్భుత విజయం సాధించడం విశేషం. క్వార్టర్స్లో జకో.. అలెగ్జాండర్ జ్వెరెవ్తో తలపడనున్నాడు. యూఎస్ ఓపెన్ ఫైనలిస్ట్ అలెగ్జాండర్.. 23వ సీడ్ దుసాన్ లాజోవిక్ను 6-4, 7-6(5), 6-3 తేడాతో ఓడించి క్వార్టర్స్లోకి ప్రవేశించాడు.
మరో మ్యాచ్లో 18వ సీడ్ గ్రిగర్ డిమిట్రోవ్ 6-4, 6-4, 6-0తో మూడో సీడ్ డొమినిక్ థీమ్ను ఓడించి నాలుగోసారి ఆస్ట్రేలియన్ ఓపెన్ క్వార్టర్స్లోకి చేరాడు. కెరీర్ అత్యుత్తమ(3వ) ర్యాంకులో ఉన్న డిమిట్రోవ్.. తన తదుపరి మ్యాచ్లో 114 ర్యాంక్ ఆటగాడైన అస్లాన్ కరాట్సేవ్తో అమీతుమీ తేల్చుకోనున్నాడు.
సెరెనా X సిమోనా
మహిళల సింగిల్స్లో రెండో సీడ్ సిమోనా హలెప్ 3-6, 6-1, 6-4 తేడాతో ఫ్రెంచ్ ఓపెన్ ఛాంపియన్ ఇగా స్వైటెక్ను ఓడించి క్వార్టర్స్లోకి అడుగుపెట్టింది. ఈమె క్వార్టర్స్లో స్టార్ క్రీడాకారిణి సెరెనా విలియమ్స్తో పోటీ పడనుంది. అంతకుముందు మాజీ 7వ ర్యాంకర్ ఆర్యానా సబాలెంకాతో జరిగిన మ్యాచ్లో విజయం సాధించింది సెరెనా. 6-4, 2-6, 6-4 తేడాతో సబాలెంకాపై ఆధిపత్యం కనబర్చిన ఈ నల్లకలువ.. రికార్డు స్థాయిలో 24వ గ్రాండ్స్లామ్ టైటిల్కు చేరువైంది. గతంలో ఏడు సార్లు ఆస్ట్రేలియన్ ఓపెన్ను నెగ్గిన 39 ఏళ్ల సెరెనా.. ఎనిమిదో సారి ఈ టోర్నీలో జయకేతనం ఎగురవేయాలని ఊవిళ్లూరుతోంది.
ఈ గ్రాండ్స్లామ్లో టైటిల్ ఫేవరెట్గా బరిలోకి దిగిన నవోమి ఒసాకా.. మూడో రౌండ్లో రాడ్ లావర్ అరెనాపై 4-6, 6-4, 7-5 తేడాతో చెమటోడ్చి నెగ్గింది.
ఇవీ చదవండి:
