కరోనా వ్యాప్తి నేపథ్యంలో క్రీడలన్నీ వాయిదా పడుతుంటే... ఒలింపిక్స్ సన్నాహాల్లో ఉన్న ఆటగాళ్లు మాత్రం సందిగ్ధంలో ఉన్నారు. ఓవైపు దేశాలన్నీ కొన్ని రోజులు షట్డౌన్ ప్రకటిస్తుండగా, జపాన్ మాత్రం షెడ్యూల్ ప్రకారమే (జులై 24 నుంచి ఆగస్టు 9) ఈ మెగా ఈవెంట్ను నిర్వహిస్తామని ధీమా వ్యక్తం చేస్తోంది. ఈ నేపథ్యంలోనే ప్రపంచ అథ్లెటిక్స్ ఫెడరేషన్(ఐఏఏఎఫ్) అధ్యక్షుడు లార్డ్ సెబాస్టియన్ కో.. పరోక్షంగా చేసిన ఓ సూచన చర్చనీయాంశమైంది. ఒలింపిక్స్ తేదీలు మారే అవకాశముందని ఇందులో చెప్పడం సంచలనంగా మారింది. ఓ ప్రముఖ కార్యక్రమంలో మాట్లాడుతూ ఈ వ్యాఖ్యలు చేసినట్లు తెలుస్తోంది.
ప్రస్తుత పరిస్థితుల్లో వాయిదా తప్ప, ఒలింపిక్స్ నిర్వహకుల చేతుల్లో మరో అవకాశం లేదని సెబాస్టియన్ చెప్పినట్లు తెలుస్తోంది. వీలైతే సెప్టెంబర్ లేదా అక్టోబర్లో ఈ పోటీలు జరగొచ్చని అభిప్రాయపడ్డాడట. అయితే తుది నిర్ణయంపై ఇంకా చర్చలు జరుగుతున్నాయని, అధికారిక ప్రకటన వచ్చేవరకు వేచి చూడాలని అన్నారని సమాచారం. 2012 లండన్ ఒలింపిక్స్ ఆర్గనైజింగ్ కమిటీకి ఇతడు ఛైర్మన్గానూ పనిచేశాడు.
అథ్లెట్ల నుంచి నిరసన
ఒలింపిక్స్ నిర్వహిస్తామని ఐఓసీ, టోక్యో ప్రభుత్వం ప్రకటిస్తుంటే.. ఆ నిర్ణయాలపై కొంతమంది టాప్ అథ్లెట్లు విమర్శలు చేస్తున్నారు. ఇప్పటికే ఒలింపిక్స్ ఛాంపియన్ కేథరినా స్టెఫానిడీ.. అథ్లెట్ల ఆరోగ్యాన్ని పణంగా పెడుతున్నారని ఆగ్రహం వ్యక్తం చేసింది.
కరోనా నేపథ్యంలో క్రీడా సంబరంపై కీలక నిర్ణయం తీసుకోవాలని ఆయా దేశాల నుంచి అభిప్రాయాలు వస్తున్నాయి. శుక్రవారం.. రోమ్ వేదికగా అంతర్జాతీయ ఒలింపిక్ కమిటీ సమావేశం జరిగింది. దాదాపు 100 మంది అధికారులు హాజరయ్యారు. ఈ వేదికపై ఇటలీకి చెందిన ఒలింపిక్ పసిడి పతక విజేత సోఫియా, మిచెల్.. కరోనా వల్ల తమ దేశంలోని ప్రస్తుత పరిస్థితిని వివరించారు. ఈ నేపథ్యంలో వీరంతా కలిసి ఓ నిర్ణయానికి రానున్నట్లు తెలుస్తోంది.
ఈ మెగాఈవెంట్ కోసం జపాన్ దాదాపు లక్షల కోట్ల రూపాయలు ఖర్చుచేసింది. అనుకున్న సమయంలో టోర్నీ నిర్వహించకపోతే అది ఆ దేశ ఆర్థిక వ్యవస్థపైనే ప్రభావం చూపనుంది. ఈ నేపథ్యంలో ఐఓసీ అధికారులు, టోక్యో నిర్వాహకులు కచ్చితమైన నిర్ణయం తీసుకోలేకపోతున్నారు.
జపాన్లోనూ కొవిడ్-19 ప్రభావం ఎక్కువగానే ఉంది. మొత్తం 1007 కేసులు నమోదవగా, ఇందులో 35 మంది మరణించారు. ఇటీవలే జపాన్ ఒలింపిక్ కమిటీ ఉపాధ్యక్షుడు కోజో తాషిమా ఈ వైరస్ బారిన పడటం చర్చనీయాంశమైంది.
