2028 లాస్ ఏంజెలిస్ ఒలింపిక్సే లక్ష్యంగా.. వ్యూహాలకు పదును పెడుతున్నట్లు తెలిపారు క్రీడా శాఖ మంత్రి కిరణ్ రిజిజు. ఆ ఒలింపిక్స్లో భారత్ అధిక పతకాలు సాధించడమే లక్ష్యంగా వ్యూహాత్మకమైన పద్ధతిని ఎంచుకున్నట్లు తెలిపారు. ప్రతి రాష్ట్రం ఒక్కో క్రీడపై ప్రత్యేక దృష్టి సారించి.. దానికి సంబంధించిన అథ్లెట్లను మరింత మెరుగ్గా ఆడేలా తీర్చిదిద్దాలని ఆయా రాష్ట్రప్రభుత్వాలను కోరినట్లు వెల్లడించారు కిరణ్. దీంతో పాటు మిగతా ఆటలను తమ శక్తి మేరకు ప్రోత్సహించాలని తెలిపారు.
ఈ విధమైన వ్యూహత్మకమైన పద్ధతిని పాటించడం వల్ల టోక్యో ఒలింపిక్స్లోనే కాకుండా 2028 లాస్ ఏంజెలిస్ ఒలింపిక్స్ పతకాల జాబితాలో భారత్ టాప్ -10లో నిలుస్తుందని ఆశాభావం వ్యక్తం చేశారు. ఇప్పటికే 14 రాష్ట్రాలు 14 క్రీడలను ఎంచుకుని వాటిపై పూర్తిస్థాయి దృష్టి సారించి కసరత్తులు చేస్తునాయన్నారు. అందులో రెజ్లింగ్, ఆర్చరీ, బాక్సింగ్, హాకీ, షూటింగ్ తదితర క్రీడలు ఉన్నాయని చెప్పుకొచ్చారు.
కలిసి పనిచేయాలి
ఒలింపిక్స్లో భారత్ తన సత్తా చాటాలంటే స్పోర్ట్స్ ఫెడరేషన్స్, ప్రభుత్వం, కార్పొరేట్ వ్యవస్థ కలిసి సంయుక్తంగా పనిచేయాల్సిన సమయం ఆసన్నమైందని అన్నారు రిజిజు. ప్రతిభ కనబరిచిన అథ్లెట్లను మెరుగైన శిక్షణ కోసం ఈ కార్పొరేట్ సంస్థలు తయారు చేసిన మెరుగైన సౌకర్యాలతో కూడిన శిక్షణ శిబిరాలకు పంపిస్తామని తెలిపారు.
ఇది చూడండి : బాలీవుడ్ సినిమాలా అనిపించే 'సౌరభ్ గంగూలీ' ప్రేమకథ
