Thomas Uber cup 2022 final india mens team: థామస్ కప్లో భారత జట్టు జోరు కొనసాగుతోంది. క్వార్టర్‌ఫైనల్లో మలేసియాను కంగుతినిపించిన భారత్.. సెమీస్‌లో పటిష్టమైన డెన్మార్క్‌ను చిత్తుచేసింది. శుక్రవారం జరిగిన సెమీస్‌లో భారత్ 3-2తో డెన్మార్క్‌పై విజయం సాధించింది. మొదటి మ్యాచ్‌లో భారత్‌కు చుక్కెదురైనా.. తర్వాతి పోరాటాల్లో కిదాంబి శ్రీకాంత్‌ బృందం అద్భుతమైన ప్రదర్శనతో అదరగొట్టింది. తొలి సింగిల్స్‌లో లక్ష్యసేన్‌ 13-21, 13-21తో ప్రపంచ నంబర్‌వన్‌ విక్టర్‌ అక్సెల్సెన్‌ చేతిలో పరాజయం చవిచూశాడు. అయితే డబుల్స్‌లో సాత్విక్‌ సాయిరాజు- చిరాగ్‌శెట్టి జోడీ 21-18, 21-23, 22-20తో కిమ్‌ ఆస్ట్రప్‌- మథియస్‌ క్రిస్టియన్సెన్‌ జంటపై గెలుపొంది 1-1తో స్కోరును సమం చేసింది. ఒక గంటా 18 నిమిషాల పాటు సాగిన మ్యాచ్‌లో భారత స్టార్‌ జోడీ గొప్పగా పోరాడింది.
అనంతరం శ్రీకాంత్‌ జట్టును గెలిపించే బాధ్యత తీసుకున్నాడు. రెండో సింగిల్స్‌లో శ్రీకాంత్‌ 21-18, 12-21, 21-15తో ఆండర్స్‌ ఆంథోన్సెన్‌ను చిత్తుచేశాడు. ఒక గంటా 20 నిమిషాల పాటు నువ్వానేనా అన్నట్లు మ్యాచ్‌ సాగింది. స్మాష్‌లతో విరుచుకుపడిన శ్రీకాంత్‌ ప్రత్యర్థిపై పైచేయి సాధించి భారత్ 2-1తో ఆధిక్యాన్ని అందించాడు. కాని రెండో డబుల్స్‌లో భారత్‌కు నిరాశ ఎదురైంది. కృష్ణప్రసాద్‌- విష్ణువర్ధన్‌గౌడ్‌ జోడీ 14-21, 13-21తో ఆండర్స్‌ రస్‌ముసెన్‌- ఫ్రెడరిక్‌ సోగార్డ్‌ జంట చేతిలో ఓడటంతో 2-2తో స్కోరు సమమైంది. నిర్ణయాత్మక మూడో సింగిల్స్‌ ఆసక్తికరంగా మొదలైన తర్వాత ఏకపక్షంగా ముగిసింది. మంచి ఫామ్‌లో ఉన్న ప్రణయ్‌ 13-21, 21-9, 21-12తో రస్‌ముస్‌ గెమ్కీని చిత్తుచేసి 3-2తో భారత్‌కు విజయాన్ని అందించాడు. తొలి గేమ్‌లో తేలిపోయిన ప్రణయ్‌ ఆ తర్వాత చెలరేగిపోయాడు. రెండో గేమ్‌లో 11-1తో ఆధిపత్యం ప్రదర్శించిన అతడు 21-9తో గేమ్‌ను ముగించాడు. మూడో గేమ్‌లోనూ జోరు కొనసాగించాడు. మరో సెమీస్‌లో ఇండోనేషియా 3-2తో జపాన్‌ను ఓడించింది. భారత్, ఇండోనేషియా మధ్య థామస్ కప్ ఫైనల్‌ ఆదివారం జరగనుంది. ఉబెర్ కప్లో స్వర్ణం కోసం శనివారం చైనా, దక్షిణ కొరియా తలపడనున్నాయి.
ఇదీ చూడండి: థామస్ కప్లో భారత్ సంచలనం.. 43 ఏళ్ల తర్వాత సెమీస్కు.. పతకం ఖాయం
