మహిళా హాకీ టీమ్ కెప్టెన్ రాణి రాంపాల్, గోల్ కీపర్ సవితా పునియాతో పాటు పారాలింపిక్స్లో పతకాలు గెలిచిన మరియప్పన్ తంగవేలు, శరద్ కుమార్లకు ప్రమోషన్లు లభించాయి. వీరితో పాటు ఒలింపిక్స్లో మహిళా హాకీ జట్టు కోచ్ బృందంలో ఉన్న పీయూష్ దూబేకూ ప్రమోషన్ ఆఫర్ వచ్చింది. ఒలింపిక్స్(olympics 2020)లో సత్తాచాటిన వీరికి చేయూతనందించేందుకు ఈ నిర్ణయం తీసుకుంది. సాయ్ 55వ పాలక మండలి సమావేశంలో ఈ అంశంపై చర్చించి నిర్ణయం తీసుకున్నారు. దీంతో పాటు మరికొన్ని నిర్ణయాలు ఇలా ఉన్నాయి.
- ఇటీవల లివర్ కేన్సర్తో మరణించిన బాక్సర్ డింగో సింగ్ కుటుంబానికి ఆర్థిక చేయూతనందిస్తున్నట్లు సాయ్ ప్రకటించింది. ఆ కుటుంబాన్ని ఆర్థికంగా ఆదుకునేందుకు 6.87 లక్షలు అందిస్తున్నట్లు వెల్లడించింది.
- ఇక ప్రమోషన్ల విషయానికి వస్తే.. హాకీ గోల్ కీపర్ సవితను అసిస్టెంట్ కోచ్ నుంచి కోచ్గా, మహిళా హాకీ జట్టు కెప్టెన్ రాణి రాంపాల్, ప్రవీణ్ దూబేలను సీనియర్ కోచ్లగా ప్రమోట్ చేశారు. పారాలింపిక్స్లో రెండోసారి పతకం సాధించిన హైజంపర్ మరియప్పన్కు చీఫ్ కోచ్ నుంచి సీనియర్ కోచ్గా, శరద్ కుమార్కు అసిస్టెంట్ కోచ్ నుంచి కోచ్గా బాధ్యతలు అప్పగించారు.
- 2024, 2028 ఒలింపిక్స్ను దృష్టిలో పెట్టుకుని సాయ్, టార్గెట్ ఒలింపిక్ పోడియం స్కీమ్ (TOPS)ను మరింత బలోపేతం చేసేందుకు ఖాళీలను భర్తీ చేయాలని నిర్ణయించారు. అందుకోసం పలు పోస్టుల కోసం నోటిఫికేషన్ జారీ చేయనున్నారు.
- స్పోర్ట్స్ సైన్స్ అనుభవజ్ఞులు, హై పర్ఫామెన్స్ కోచ్లతో పాటు మరికొందరు ప్రొఫెషనల్స్ను సాయ్ నియమించనుంది.
- సైంటిఫిక్ స్టాఫ్లో 300 అదనపు పోస్టులకు సాయ్ అనుమతినిచ్చింది. ఇందులో హై పర్ఫామెన్స్ అనలిస్ట్ (138), హై పర్ఫామెన్స్ డైరెక్టర్స్ (23), స్పోర్ట్స్ మెడిసిన్ డాక్టర్స్ (23), ఫిజియోథెరపిస్ట్ (93), మసాజర్స్ (104) వంటి పోస్టులు ఉన్నాయి.
- ఈ పోస్టులతో పాటు అదనంగా హై పర్ఫామెన్స్ అనలిస్టులు అనగా స్ట్రెంత్ అండ్ కండిషనింగ్ కోచ్, స్పోర్ట్స్ పర్ఫామెన్స్ అనలిస్ట్, బయోమెకానిస్ట్, సైకాలజిస్ట్, వీడియో అనలిస్ట్, ఫిజియాలజిస్ట్లను నియమించనుంది.
- వీటితో పాటు 50 మంది హై పర్ఫామెన్స్ కోచ్లను అదనంగా నియమించనుంది సాయ్.
