షూటర్ అంజుమ్ మౌద్గిల్ను ఖేల్ రత్నకు.. జస్పాల్ రాణాను ద్రోణాచార్యకు నేషనల్ రైఫిల్ అసోసియేషన్ ఆఫ్ ఇండియా (ఎన్ఆర్ఏఐ) నామినేట్ చేయనున్నట్లు సమాచారం. వీటిని పొందడానికి వీరిద్దరికి తగిన అర్హత ఉందని వారు భావిస్తున్నారు.
ఇదే జరిగితే జస్పాల్ రాణాను రెండోసారి ఈ పురస్కారానికి నామినేట్ చేసినట్లు అవుతుంది. వీరితో పాటు పిస్టోల్ షూటర్ సౌరభ్ చౌదరి, అభిషేక్ వర్మ పేర్లను అర్జున అవార్డుకు పంపుతున్నట్లు ఎన్ఆర్ఏఐ సీనియర్ అధికారి ఒకరు తెలియజేశారు.
ఆరంభంలోనే పతకం
టోక్యో ఒలింపిక్స్కు దేశం నుంచి అర్హత సాధించిన తొలి ఇద్దరిలో అంజుమ్ మౌద్గిల్ ఒకరు. 2008లో షూటింగ్ ప్రారంభించిన అంజుమ్.. అదే ఏడాది కొరియాలో జరిగిన పది మీటర్ల ఎయిర్ రైఫిల్ ఈవెంట్లో రజత పతకం సాధించింది. గతేడాది బీజింగ్లో జరిగిన ఐఎస్ఎస్ఎఫ్ ప్రపంచకప్లో దివ్యాన్ష్ సింగ్తో కలిసి 10 మీటర్ల ఎయిర్ రైఫిల్ మిక్స్డ్ ఈవెంట్లో పసిడి గెలిచింది.
ద్రోణాచార్యకు నామినేట్
కోచ్ జస్పాల్ రాణాకు ద్రోణాచార్య అవార్డు దక్కకపోవడం పట్ల సెలక్షన్ కమిటీపై ఒలింపిక్ గోల్డ్ మెడలిస్ట్ అభినవ్ బింద్రా విమర్శలు చేశాడు. అప్పట్లో ఇది పెద్ద వివాదంగా మారింది. రాణా.. ఇప్పటివరకు బహుళ ఆసియా క్రీడల్లో బంగారు పతక విజేతగా నిలిచాడు. మను బాకర్, సౌరభ్, అనీశ్ భన్వాలా వంటి వారిని షూటర్లుగా తీర్చిదిద్దిన ఘనత రాణాకే దక్కుతుంది.
ఇదీ చూడండి.. కోహ్లీ కాదు ధోనీనే ఫేవరెట్: ధావన్
