ఈ ఏడాది జులై 23 నుంచి తలపెట్టిన టోక్యో 2020 ఒలింపిక్స్కు సంబంధించి రూల్బుక్ను విడుదల చేశారు నిర్వాహకులు. కరోనా నేపథ్యంలో నిర్వహిస్తున్న ఈ క్రీడా వేడుకలో.. ఆటగాళ్లు తీసుకోవాల్సిన జాగ్రత్తలు, నియమ నిబంధనలను 33 పేజీల పుస్తకంలో వెల్లడించారు. వీలైనంత వరకు బయట ప్రదేశాల్లో తిరగొద్దని, కరచాలనాలు ఇవ్వవద్దని, ఆలింగనాలు చేసుకోవద్దని సూచించారు. జపాన్లో ఉన్నంత కాలం కొవిడ్ ముప్పును తగ్గించుకోవడానికే ప్రయత్నించాలని పేర్కొన్నారు.
ఒలింపిక్స్ రూల్బుక్ మార్గదర్శకాలు:
- ఆటగాళ్లు తప్పనిసరిగా మాస్క్లు ధరించాలి. ట్రైనింగ్, ఆటలు ఆడేటప్పుడు, తినేటప్పుడు, పడుకున్నప్పుడు వాడాల్సిన పనిలేదు.
- ప్రతి నాలుగు రోజులకోసారి అథ్లెట్లకు కరోనా పరీక్ష చేస్తారు. ఒకవేళ పాజిటివ్ రిపోర్టు వస్తే ఒలింపిక్స్ నుంచి బహిష్కరిస్తారు.
- ఆటగాళ్లు కొవిడ్ మార్గదర్శకాలను ఉల్లంఘించినా ఒలింపిక్స్ నుంచి పంపించేస్తారు.
- గత అనుభవాలను దృష్టిలో ఉంచుకుని లక్షా 50వేల కండోమ్లను ఉచితంగా అథ్లెట్లకు ఇవ్వనున్నారు. పరిచయం లేని వ్యక్తులతో సంబంధాలు పెట్టుకోకపోవడానికే ఆటగాళ్లు మొగ్గు చూపాలని ఒలింపిక్ కమిటీ సూచించింది.
- జపాన్కు వచ్చిన 72 గంటల తర్వాత అథ్లెట్లకు కరోనా పరీక్ష నిర్వహిస్తారు. వారికి ఎటువంటి క్వారంటైన్ ఉండదు. శిక్షణ క్యాంపుల్లో పాల్గొనడానికి అనుమతిస్తారు.
- జిమ్లకు, పర్యటక ప్రాంతాలు, దుకాణాలు, రెస్టారెంట్లకు వెళ్లడానికి అథ్లెట్లకు అనుమతి లేదు. కేవలం క్రీడా వేదికలతో పాటు రూల్బుక్లో పేర్కొన్న ప్రాంతాలకు మాత్రమే వెళ్లాల్సి ఉంటుంది.
ఆటగాళ్ల శ్రేయస్సు కోసమే సదరు నిబంధనలు విధించామని ఒలింపిక్ కమిటీ తెలిపింది. ఈ నిబంధనలను ఏప్రిల్, జులైలో మరోసారి మార్చే అవకాశం కూడా ఉందని పేర్కొంది.
ఇదీ చదవండి: ఆస్ట్రేలియన్ ఓపెన్ నుంచి బోపన్న ఔట్
