డోపింగ్లో పట్టుబడిన అథ్లెట్లు కూడా(Doping Athletes) జాతీయ అవార్డులకు అర్హులేనని క్రీడా మంత్రిత్వ శాఖ(Sports Ministry) బుధవారం ఓ ప్రకటనలో తెలియజేసింది. నిషేధాన్ని పూర్తి చేసుకున్న క్రీడాకారులను పురస్కారాల(National Sports Awards) కోసం పరిగణలోకి తీసుకుంటామని పేర్కొంది. అయితే నిషేధం కొనసాగుతున్న సమయంలో సదరు క్రీడాకారులు దేశం కోసం ఎలాంటి పతకాన్ని సాధించినా.. వాటిని పరిగణలోకి తీసుకోమని స్పష్టం చేసింది. ఈ నిర్ణయం వల్ల బాక్సర్ అమిత్ పంగాల్తో పాటు మరికొంత మందికి లబ్ధి చేకూరనుంది.
గతేడాది వరకు డోపింగ్కు పాల్పడిన అథ్లెట్లు, దానికి సహకరించిన కోచ్లను జాతీయ అవార్డుల కోసం పరిగణలోకి తీసుకోలేదు. కానీ, ఈ ఏడాది నుంచి నిషేధాన్ని పూర్తి చేసుకున్న క్రీడాకారులు, కోచ్లను పురస్కారాల కోసం పరిగణలోకి తీసుకుంటామని క్రీడా మంత్రిత్వ శాఖ ప్రకటించడం విశేషం.
అమిత్ పంగాల్కు ఊరట
ఆసియన్ గేమ్స్ గోల్డ్ విన్నర్, బాక్సింగ్ ప్రపంచ ఛాంపియన్షిప్లో భారత్కు తొలి రజత పతకాన్ని సాధించిన బాక్సర్ అమిత్ పంగాల్.. ఇప్పటికే రెండు సార్లు అర్జున అవార్డుకు నామినేట్ అయ్యాడు. అయితే 2012లో చికెన్ పాక్స్ కారణంగా అతడు తీసుకున్న మందులలో నిషేధిత ఉత్ప్రేరకం ఉన్న కారణంగా జ్యూరీ అతడిని పరిగణలోకి తీసుకోలేదు. అతడికి తెలియని ఓ నిషేధిక ఔషధాన్ని తీసుకున్న కారణంగా అమిత్ పంగాల్పై వేటు పడింది. అమిత్.. గతేడాది ఖేల్రత్న అవార్డుకు నామినేట్ అయ్యాడు.
పురస్కార వేడుక వాయిదా..
ధ్యాన్చంద్ పుట్టినరోజు సందర్భంగా ఆగస్టు 29న జాతీయ క్రీడా పురస్కారాల వేడుకను(National Sports Awards 2021) నిర్వహించాల్సింది. అయితే అప్పటికే టోక్యో పారాలింపిక్స్ పూర్తి కాని నేపథ్యంలో వాటిని వాయిదా వేయాలని క్రీడా మంత్రిత్వ శాఖ నిర్ణయించింది. ఇటీవలే పారాలింపిక్స్(Tokyo Paralympics) పూర్తయిన సందర్భంగా ఈ ప్రదానోత్సవాన్ని నిర్వహించే తేదీ అతి త్వరలోనే వెల్లడయ్యే అవకాశం ఉంది.
ఇదీ చూడండి.. Pramod Bhagat: గోల్డ్ గెలిచిన పారా అథ్లెట్కు భారీ నజరానా
