భారత స్టార్ రెజ్లర్, ప్రపంచ జూనియర్ ఛాంపియన్ దీపక్ పునియా.. టోక్యో ఒలింపిక్స్కు అర్హత సాధించాడు. కజకిస్థాన్ వేదికగా జరుగుతున్న ప్రపంచ రెజ్లింగ్ ఛాంపియన్షిప్లో ఫైనల్కు దూసుకెళ్లి ఈ ఘనత సాధించాడు. ఈ క్రీడలో దేశం తరఫున ఒలింపిక్స్ బెర్త్ ఖరారు చేసుకున్న నాలుగో ఆటగాడిగా చరిత్ర సృష్టించాడు. ఇప్పటికే వినేశ్ ఫొగాట్(53 కిలోలు), భజరంగ్ పునియా(65 కిలోలు), రవి కుమార్ దహియా(57 కిలోలు).. ఒలింపిక్స్కు అర్హత సాధించారు.
- ప్రపంచ ఛాంపియన్షిప్లో 86 కేజీల విభాగంలో పోటీ పడ్డాడు దీపక్. సెమీస్లో స్టెఫాన్ రీచ్ముత్పై(స్విట్జర్లాండ్)ను 8-2 తేడాతో ఓడించాడు
- మరో యువ రెజ్లర్ రాహుల్ అవారే 61 కేజీల నాన్ ఒలింపిక్ విభాగంలో సెమీఫైనల్లో అడుగుపెట్టాడు. క్వార్టర్స్లో ఆసియా క్రీడల మాజీ ఛాంపియన్ రసుల్ను 10-7 తేడాతో ఓడించాడు. తర్వాతి మ్యాచ్లో బెకో లామ్టేడ్(జార్జియా)తో తలపడనున్నాడు.
ప్రపంచ ఛాంపియన్షిప్లో తలపడిన జితేందర్ (79 కేజీలు) క్వార్టర్ ఫైనల్లో మూడో సీడ్ మెహ్మద్ నూరి కొటానొగ్లు(టర్కీ) చేతిలో ఓడిపోయాడు. నూరి ఫైనల్ చేరితే జితేందర్కు రెపిచేజ్ ఆడే అవకాశం లభిస్తుంది.
97 కేజీల విభాగంలో పోటీపడిన మౌసమ్ ఖత్రీ ఆరంభ మ్యాచ్లోనే ఓడిపోయాడు. ఇతడికి పతకంతోపాటు టోక్యో బెర్తు సంపాదించేందుకు మరో అవకాశం ఉంది. టాప్ సీడ్ కైలీ ఫ్రెడ్రిక్ స్నైడర్ (అమెరికా)ఫైనల్ చేరితే ఇతడికి ఆ ఛాన్స్ లభిస్తుంది.
