ఒలింపిక్స్ అర్హత టోర్నీలో పాల్గొనే అవకాశం కోసం హైదరబాదీ యువ బాక్సర్ నిఖత్ జరీన్.. స్టార్ బాక్సర్ మేరీకోమ్ మధ్య గతేడాది గట్టి వివాదమే జరిగింది. ఈ సమస్యను పరిష్కరించేందుకు వీరిద్దరి మధ్య సెలక్షన్ ట్రయల్స్ను నిర్వహించింది భారత బాక్సింగ్ సమాఖ్య. ఇందులో మేరీకోమ్ విజేతగా నిలిచి ఒలింపిక్స్ బెర్త్ ఖరారు చేసుకుంది. అయితే ఇదే విషయంతో పాటు పలు ఆసక్తికర విషయాలను 'ఈటీవీ భారత్'తో జరిగిన ఎక్స్క్లూజివ్ ఇంటర్వ్యూలో నిఖత్ పంచుకుంది.
ఒలింపిక్స్కు మేరీకోమ్ అర్హత సాధించడంపై మీ అభిప్రాయం?
టోక్యో ఒలింపిక్స్కు మేరీకోమ్ అర్హత సాధించడం నాకు ఎంతో సంతోషంగా ఉంది. తాను బంగారు పతకాన్ని సాధించాలని ఆశిస్తున్నా. తనపై నాకు ఎలాంటి కోపం లేదు.
'ఈద్' పండుగ ఎలా చేసుకున్నారు?
ఈ కరోనా అందరికీ శాపంలా మారితే, నాకు మాత్రం కొంతవరకు ఊరటనిచ్చింది. గత నాలుగేళ్ల నుంచి క్రీడా ఈవెంట్లు కారణంగా నా కుటంబంతో కలిసి ఈ పండుగను జరుపుకోలేకపోయాను. లాక్డౌన్ వల్ల ఈ ఏడాది వారితో కలిసి పండుగ వాతావరణాన్ని ఎంతో సంతోషంగా ఆస్వాదించాను.
మీరు ఏ విషయాలను ఎక్కువగా ఇష్టపడతారు?
ప్రతిరోజు తెల్లవారుజామున నిద్రలేచి కసరత్తులు, బాక్సింగ్ శిక్షణ, నమాజ్ చేయడం ఎంతో ఇష్టం. ముఖ్యంగా షయారీ(కవితలు) అంటే చాలా ఇష్టం.
బాక్సర్ ఎందుకు కావాలనుకున్నారు?
అథ్లెట్గా కెరీర్ ప్రారంభంలో జరిగిన ఓ సంఘటన వల్ల బాక్సింగ్లోకి అడుగుపెట్టాను. ఓ రోజు నాన్నతో కలిసి నిజమాబాద్లోని ఓ మైదానం వద్దకు వెళ్లాను. అక్కడ అనేక మంది అబ్బాయిలు బాక్సింగ్ చేస్తూ కనిపించారు. కానీ అక్కడ ఒక్క అమ్మాయి అయినా కనిపించలేదు. దీంతో నాకు బాక్సర్ కావాలనిపించింది. ఈ నిర్ణయాన్ని తక్షణమే నాన్నకు చెప్పాను. మగవారిలా శక్తి సామర్థ్యాలు మహిళలకు ఉండవని ఆయన నాతో అన్నారు. దీంతో ఎలాగైనా ఓ బలమైన మహిళా బాక్సర్గా ఎదగాలని దృఢంగా నిశ్చయించుకున్నా. అలా 2009లో తొలిసారిగా బాక్సింగ్లోకి అడుగుపెట్టా.
ప్రస్తుతం ఈ లాక్డౌన్ సమయంలో ఇంట్లోనే ఉంటూ, ఫిట్నెస్ సహా బాక్సింగ్ శిక్షణపై దృష్టి సారించినట్లు తెలిపింది నిఖత్. కరోనా వల్ల ఈ ఏడాది టోర్నీలు జరగకపోవచ్చని అభిప్రాయపడింది. 2021, 2022లో జరగబోయే కామన్వెల్త్ క్రీడల కోసం సాధన చేస్తున్నట్లు చెప్పింది.
ఇదీ చూడండి : కరోనా తర్వాత మళ్లీ ట్రాక్పైకి రయ్.. రయ్..
