Boxer Mohammad Hussamuddin : ప్రపంచ పురుషుల బాక్సింగ్ ఛాంపియన్షిప్స్ సెమిస్కు చేరిన ప్రముఖ బాక్సర్ మహమ్మద్‌ హుసాముద్దీన్ మోకాలి గాయం కారణంగా పోటీ నుంచి తప్పుకున్నాడు. వైద్యులు సూచన మేరకు సెమీస్ బౌట్ ఆడకూడదని నిర్ణయించుకున్నాడు. దీంతో ప్రపంచ పురుషుల బాక్సింగ్ ఛాంపియన్‌షిప్స్‌లో కాంస్య పతకంతో సరిపెట్టుకున్నాడు. మరోవైపు భారత్కు చెందిన మరో ఇద్దరు బాక్సర్లు దీపక్ భోరియా, నిశాంత్ దేవ్లు కూడా పురుషుల 51, 71 కేజీల విభాగంలో కాంస్యం పతకాలను ముద్దాడారు. ప్రపంచ ఛాంపియన్షిప్స్ 51 కేజీల విభాగం సెమీస్‌లో రెండుసార్లు కాంస్య పతకాన్ని గెలిచిన ఫ్రాన్స్ బాక్సర్ బిలాల్ బెన్నామాతో జరిగిన పోరులో దీపక్ 3-4 తేడాతో ఓటమిపాలయ్యాడు.
ఇప్పటికే ప్రపంచ పురుషుల బాక్సింగ్ ఛాంపియన్‌షిప్స్‌లో సెమీస్కు చేరి చరిత్ర సృష్టించాడు నిజామాబాద్‌కు చెందిన ఈ 29 ఏళ్ల బాక్సర్ హుసాముద్దీన్. శుక్రవారం ఉజ్బెకిస్థాన్ రాజధాని తాష్కెంట్‌లో జరిగిన క్వార్టర్స్ పోరులో హుసాముద్దీన్ గాయపడ్డాడు. ఆ బౌట్‌లో పురుషుల 57 కేజీల విభాగంలో బల్గేరియాకు చెందిన జె.డియాజ్ ఇబానెజ్‌తో తలపడుతుండగా.. హుసాముద్దీన్ మోకాలికి గాయమైంది. దీంతో అతడు సెమీఫైనల్ బౌట్ నుంచి వైదొలగాల్సి వచ్చింది.
"హుస్సాముద్దీన్ గాయం కారణంగా వాకోవర్ ఇచ్చి కాంస్యంతో సరిపెట్టుకున్నాడు. క్వార్టర్ ఫైనల్ బౌట్ సమయంలో అతడి మోకాలి గాయం అయింది. దీంతో కొద్దిరోజుల వరకు ఆటకు దూరంగా ఉండాలని సలహా ఇచ్చాము." అని బాక్సింగ్ ఫెడరేషన్ ఆఫ్ ఇండియా (బీఎఫ్ఐ) ఓ ప్రకటనలో తెలిపింది. ఒకవేళ గాయంతోనే హుసాముద్దీన్ బౌట్ను కొనసాగించి సెమీస్కు చేరి తలపడితే.. గాయం మరింత తీవ్రమై కోలుకోవడం కష్టంగా మారుతుందని వైద్యులు సూచించారు. ఈ మేరకు అతడు టోర్నమెంట్ను నుంచి తప్పుకుంటున్నట్లు ప్రకటించాడు.
ఇద్దరికీ తొలి ఛాంపియన్షిప్!
World Boxing Championships 2023 : ఒకే ప్రపంచ బాక్సింగ్ ఛాంపియన్‌షిప్స్‌లో ముగ్గురు భారత బాక్సర్లు క్వార్టర్స్ దాటడం ఇదే తొలిసారి. శుక్రవారం జరిగిన ఈ పోరులో బలమైన ప్రత్యర్థులతో వీరు తలపడ్డారు. ప్రపంచ ఛాంపియన్షిప్స్ అరంగేట్రంలోనే సత్తాచాటిన హుసాముద్దీన్.. ఈ క్వార్టర్స్లో నెగ్గితే గనుకు సెమీస్కు చేరుకునేవాడు. అనంతరం చివరి నాలుగు బౌట్లు 57 కేజీల విభాగం సెమీస్‌లో క్యూబాకు చెందిన సైడెల్ హోర్టాతో ఢీకొనేవాడు. దురదృష్టవశాత్తు గాయం కావడం అతడికి ఆ అవకాశాన్ని చేజార్చుకునేలా చేసింది. హోర్టా సైతం తొలిసారి ప్రపంచ ఛాంపియన్‌షిప్స్‌లో ఆడటం విశేషం.
