దుబాయ్ వేదికగా జరుగుతోన్న ఆసియన్ బాక్సింగ్ ఛాంపియన్షిప్స్లో భారత బాక్సర్లు సత్తా చాటారు. 52 కేజీల పురుషుల విభాగంలో డిఫెండింగ్ ఛాంపియన్ అమిత్ పంగాల్ సెమీస్లోకి దూసుకెళ్లాడు. మంగోలియా బాక్సర్ ఖార్ఖు ఎన్ఖ్మండఖ్పై విజయం సాధించి.. ఈ పోటీల్లో పతకాన్ని ఖాయం చేసుకున్నాడు పంగాల్. ఇక మరో బాక్సర్ వారిందర్ సింగ్ 60 కేజీల విభాగంలో ఫిలిప్పీన్స్ బాక్సర్ జెరె సాముల్పై 5-0తో గెలుపొంది సెమీస్కు అర్హత సాధించాడు.
మరో పోటీలో భారత బాక్సర్ సంజీత్.. తజకిస్థాన్కు చెందిన జసుర్ ఖుర్బనోవ్పై విజయం సాధించాడు. 5-0తో విజయం సాధించిన భారత బాక్సర్ సెమీస్కి అర్హత పొందాడు. తన తర్వాత పోటీలో ఉజ్బెకిస్థాన్కు చెందిన సంజర్ తుర్సునోవ్తో తలపడనున్నాడు.
ఇప్పటికే సాక్షి, సంజీత్, జాస్మిన్, సిమ్రాన్జీత్ కౌర్, మేరీ కోమ్, శివ థాప.. క్వార్టర్స్లో విజయాలు సాధించి భారత్కు ఏదో ఒక పతకాన్ని ఖాయం చేసుకున్నారు. తాజాగా పంగాల్ కూడా వీరితో పాటు చేరాడు. దీంతో ఈ సీజన్లో భారత్ మొత్తం 14 పతకాలను ఖాయం చేసుకుంది. 2019లో ఆసియన్ ఛాంపియన్షిప్స్లో 13 పతకాలు సాధించింది ఇండియా. ఈసారి ఈ సంఖ్య మరింత పెరిగే అవకాశం ఉంది.
ఇక మహిళల పోటీల్లో సాక్షి(54 కేజీ).. తజకిస్థాన్కు చెందిన రుహాఫ్జో హఖజరోవాపై 5-0తో గెలుపొందింది. తన తదుపరి పోటీలో టాప్ సీడ్, కజకిస్థాన్ బాక్సర్ దినా జోలమన్తో తలపడనుంది. మరో భారత బాక్సర్ జాస్మిన్.. మంగోలియా బాక్సర్ ఒయున్త్సెగ్ యెసుగెన్పై 4-1తో విజయం సాధించింది. తన తర్వాతి రౌండ్లో కజకిస్థాన్ ప్లేయర్ వ్లాదిస్లావ కుఖ్తాతో పోటీకి దిగనుంది. ఇటీవలే కొవిడ్ నుంచి కోలుకున్న సిమ్రాన్జీత్ కౌర్.. ఉజ్బెకిస్థాన్ బాక్సర్ రైఖోనా కొడిరోవాపై 4-1తో గెలుపొందింది. తన తర్వాతి మ్యాచ్లో కజకిస్థాన్ బాక్సర్తో తలపడనుంది.
ఇదీ చదవండి: టెస్టుల్లో ఆ సిక్స్.. క్రిస్ గేల్, పంత్కే సాధ్యం!
